257 total views
Hinihimok ni Lingayen-Dagupan Archbishop Emeritus Oscar Cruz ang pamunuan ng Catholic Bishops Conference of the Philippines (CBCP) na maglabas ng pahayag hinggil sa usapin ng $81-milion money laundering scheme na nasasangkot ang casino.
Ayon sa Arsobispo, kung siya ang masusunod nais niyang ipaalam sa publiko kung ano ang masamang dulot ng casino sa bansa at sa buhay ng bawat nalululong dito.
Pahayag ni Archbishop Cruz, hindi nararapat ang casino sa bansa na alam ang tama at mali, at mas lalong hindi ito kailangan ng mga Filipino dahil sinisira nito ang pamilya, ang kinabukasan ng mga kabataan at ang lipunan.
“Kung ako ang masusunod, nais kong magpalabas ng isang pahayag ang (CBCP) na una ang casino ay hindi marapat sa mga bansa na alam pa ang tama at mali, alam pa ang pagnanakaw at matuwid na buhay, sinisira nito ang pamilya, propesyon at pangalan ng lipunan…” pahayag ni Archbishop Cruz sa panayam ng Radyo Veritas.
Dagdag pa ng arsobispo, hindi lamang dapat hinggil sa langit ang ibinabahagi ng Simbahan kundi maging ang mga usapin sa lupa na apektado ang moral ng tao gaya ng pasugalan na nagpapahirap pa sa mamamayang Filipino dahil na rin sa mga pandaraya
“Kailangan-kasing mangusap, hindi naman pwede ang Simbahan tungkol sa langit lang, dapat mangusap din hinggil sa kaganapan sa lupa dahil si Kristo lamang anghel at demonyo ang pinangaral niya,” pahayag pa ng Arsobispo.
Ayon sa ulat, ang $81-milyon ay ninakaw sa pamamagitan ng hacking mula sa Bangladesh government at inilagak ang salapit sa Pilipinas sa iba’t-ibang account ng casino sa pamamagitan ng Rizal Commercial Banking Corp. (RCBC) na naging dahilan upang mag imbestiga ang Senate Blue Ribbon Committee kung saan hindi naman nila nakuha ang nais na detalye mula sa mga nasasangkot na personalidad dahil na rin sa Bank Secrecy Law.
Sa ulat ng New York Times noong August 2015, sinasabing pinaka-corrupt ang Pilipinas sa mga bansa sa buong Asya.
Tinatayang nasa mahigit 40 ang operasyon ng casino sa Pilipinas habang sa pag-aaral ng Gamblers Anonymous 1/3 ng mga nalululong sa sugal mga babae na nasa kanilang adolescence days
