152 total views
Pagbibigay-boses sa iba’t ibang sektor ng lipunan na mapakinggan ang kanilang hinaing at tunay na suliranin ng mga tumatakbong kandidato sa darating na halalan.
Ito ayon kay Rev. Fr. Xavier Alpasa, SJ – Executive Director ng Simbahang Lingkod ng Bayan ang pangunahing layunin ng pagsasagawa ng ANG KAILANGANG BOSES – isang Senatorial Forum kasama ang mga Marginalized at Vulnerable Sectors sa bansa.
Paliwanag ng Pari, sa halip na pagsagot sa mga mapanirang usapin ay mas kinakailangang tugunan ng mga kandidato ang mga sitwasyon at hinaing ng mga mamamayan na kanyang pagsisilbihan sa panunungkulan.
Giit ni Fr. Alpasa, napapanahon na upang maging malalim ang diskurso ng mga usapin at seryosohin ang talakayan kaugnay ng halalan sa bansa upang tunay na makapaghalal ng mga bagong lider na mamumuno sa ating bayan.
“Napansin natin na sa halalan na ito at mga nakaraan ding halalan kadalasan ang pag-uusap ay tungkol sa personalidad, tungkol sa mga kandidato, tungkol sa kanilang mga katangian, tungkol sa kanilang mga isyu pero bakit hindi pero hindi pinapakinggan ‘yung isyu ng taumbayan, hindi pinapakinggan ‘yung mas mga nangangailangan, ‘yung mga iniiwanan at hindi binibigyan ng boses kaya ang porma ng pagtatanghal, ang Senatorial Forum na ito ay tinaguriang Ang Kailangang Boses, dalawa nga ‘yung ibig sabihin namin sa Bosses eh, yung boses na tinig at yung tunay na mga Boss.. So ang kailangang mga boses po ay mga tao kaya inimbitahan namin ang iba’t ibang sektor para mapakingan natin sila kung ano ang pangarap at hinaing nila na siya namang dapat iparinig sa mga tatakbo ngayong halalan..” ang bahagi ng pahayag ni Rev. Fr. Alpasa, sa Radio Veritas.
Kaugnay nga nito, naging matagumpay ang isinagawang Senatorial Forum sa Ateneo De Manila University na pinangunahan ng Simbahang Lingkod ng Bayan, Ateneo Task Force 2016 at Task Force Election na kinabibilangan ng Radio Veritas kung saan nagsilbing pangunahing boses ang mga kinatawan mula sa iba’t ibang sector ng lipunan tulad ng mga Overseas Filipino Workers, mga sector ng manggagawa, Internally-Displaced Person, detainees, mga katutubo, mga may kapansanan o Person with Disabilities at maging mga magsasaka mula sa sector ng agrikultura.
Samantala, dinaluhan naman ng pitong kandidato para sa pagka-Senador ang naturang Forum, partikular na nina Atty. Lornan Kapunan, Former Senator Richard Gordon, Atty. Allan Montaño, Pasig Rep. Roman Romulo, Former Anakbayan Rep. Walden Bello, Valenzuela Rep. Win Gatchalian at Leyte Rep. Ferdinand Martin Romualdez.
Batay sa Commission on Elections Resolution No. 10002, mayroong 18,083 posisyon ang bukas para sa panunungkulan at pamumuno ng mga bagong lider na maihahalal ngayong darating na May 9 – National at Local Elections, kabilang na ang posisyon sa pagkapangulo, pangalawang pangulo, 12 senador, 59 na partylist representatives at higit 18-libong posisyon sa lokal na pamahalaan.
Kaugnay nga nito, sa pinakahuling tala ng Comelec, tinatayang umabot sa higit 54.6 na milyon ang rehistradong botante na nakapagpatala para sa susunod na eleksyon.
Sa tala ng National Youth Commission, 40% sa 52-milyong rehistradong botante sa kasalukuyan ay mga kabataan edad 18 hanggang 30 taong gulang bukod pa sa 1.4 milyong Overseas absentee voters na malaki ang maaring maging papel sa nakatakdang 2016 National at Local Elections.
Batay sa tagubilin pastoral ng Catholic Bishops Conference of the Philippines sa mga botante na ang mga kandidatong tunay na may kakayahan ay kayang gampanan ang tungkulin sa pamumuno, maayos ang kalusugang pampisikal, may kakayahang pangkaisipan at matatag na damdaming kinakailangan upang magampanan ang mga tungkulin nakaatang kalakip ang katapatang maglingkod sa pamayanan.