380 total views
Dismayado si Cubao Bishop Honesto Ongtioco sa patuloy na pag-iral ng “political dynasty” sa bansa.
Ikinalulungkot ni Bishop Ongtioco na kontrolado at hawak na ng ilang angkan ang mga posisyon sa iba’t-ibang lugar ng bansa.
Nilinaw ng Obispo na ang kapangyarihan na hatid ng anumang posisyon o katungkulan sa pamahalaan ay nararapat na may kaakibat na katapatan at buong pusong paglilingkod sa mga nasasakupan at hindi angkinin lamang ng ilang angkan.
“Ang ibig sabihin ng authority kapangyarihan katulad ng ipinakita ni Hesus maglingkod, eh sa nangyayari ngayon sila ang pinaglilingkuran, sila ang amo, sila ang Panginoon. Samantalang ang kapangyarihan ang ibig sabihin maglingkod ibigay mo ang sarili mo, ibuhos mo kakayahan mo, talino mo hindi para sambahin ka, hindi para mag-ipon para sa iyong sarili, para sa susunod na henerasyon, para sa mga apo mo, para sa mga anak mo sunod-sunod kaya napakalungkot yung political dynasty na sinasabi parang akala mo wala ng ibang may talino, may kakayahang mamuno kung hindi ‘yung magkakamag-anak..” pahayag ni Bishop Ongtioco sa panayam ng Radio Veritas.
Ayon sa datos ng Center for People Empowerment in Governance (CenPEG) aabot sa 178 ang bilang ng mga ‘dominant political dynasties’ o kilalang angkan sa larangan ng politika sa bansa, kung saan sa 94 na porsyento sa 80-probinsya sa Pilipinas ay mayroong political dynasty.
Kaugnay nito, batay sa tala 75-porsyento sa mga kasalukuyang mambabatas sa Kongreso ang nagmula sa mga kilalang angkan sa Politika samantalang tanging tatlo lamang sa mga kasalukuyang Senador ang hindi kabilang sa Dinastiya.
Sa kasalukuyan, mayroon nang dalawang panukalang batas sa Senado at Mababang Kapulungan ng Kongreso kaugnay ng political dynasty na Senate Bill No 2649 – An Act to Prohibit the Establishment of Political Dynasties at House Bill No 3413 – An Act Prohibiting the Establishment of Political Dynasties na pinangunahan ni Senator Miriam Defensor Santiago at former Congressman Teddy Casiño. (Reyn Letran)
