173 total views
Itinuturing ni Lipa Archbishop Ramon Arguelles, Chaiirman ng CBCP Permanent Committee on Public Affairs na kabalintunaan ang ginawa ng pangulong Benigno Aquino III na pagsuporta sa marami pang coal-fired power plants at mining operations sa bansa.
Ayon kay Archbishop Arguelles, ipinangako ng Pangulo ng Pilipinas sa Intended nationally Determined Contribution sa United Nations Framework Convention on Climate Change na pabababain nito ng 70 porsyento ang carbon emission sa bansa simula 2015 hanggang 2030.
“Salamat at yung Presidente nagpunta sa Paris pumirma sya na kasali ang Philippines sa pagsupress ng further deterioration of the environment , pero pagdating nya dito, unan nag attend sya ng opening ng Coal Fired Power Plant sa Davao, then marami syang pinirmahan na mga mining developments, at saka research at saka yung mga Coal Fired Power Plant , that is a contradiction.” Pahayag ni Abp. Arguelles sa Radyo Veritas.
Dahil dito hinikayat ng Arsobispo ang bawat mamamayan at mga lokal na pamahalaan na manindigan at protektahan ang iba pang lalawigan na pinagiinteresan ng mayayamang kumpanya.
Paalala ni Abp. Arguelles, hindi dapat magpasilaw sa pera ang mga lokal na pinuno ng mga lalawigan dahil ang pagiging gahaman at makasarili ang magdudulot ng pagkawasak sa buong komunidad.
Sa kasalukuyan patuloy ang operasyon ng Calaca Power Station na may 600 Megawatt Coal Fired Power Plant sa Brgy San Rafael, Calaca, Batangas.
Ang naturang pasilidad ay pagaari ng DMCI Holdings Inc. na una nang inireklamo ng mga mamamayan ng Palawan dahil sa pagtatayo rin nito ng 15Megawatt Coal Fired Power Plant sa lalawigan.
Sa kasalukuyan may 17 Coal Fired Power Plants sa Pilipinas, habang nakaamba pang magtayo ng karagdagang 29 na pasilidad hanggang sa taong 2020.
Una nang kinondena ng kanyang Kabanalan Francisco ang maruming pinagkukunan ng mga enerhiya.
Sa Ensiklikal na Laudato Si, pinuna ni Pope Francis ang hindi makatarungang gawain ng mga multinasyonal na kumpanyang mula sa mga maunlad na bansa o First Wolrd Countries.
Aniya pagkatapos ng kanilang mga aktibidad, sa kanilang paglisan ay nag iiwan sila ng malalaking pasanin sa mga tao at sa kalikasan tulad ng kawalan ng trabaho, pagkaubos ng likas na pagkukunan, pagkakalbo ng kagubatan, pagkalugi ng agrikultura, uka-ukang burol, at maruruming ilog.(Leahna Villajos)
