41,777 total reads
Itinalaga naman si Fr. Marlito Ocon bilang bagong national director ng Pope’s Worldwide Prayer Network sa Pilipinas.
Inanunsyo ang kanyang pagkakatalaga nitong Martes, kasunod ng pagpili sa kanya ng international director ng organisasyon na si Fr. Cristóbal Fones, SJ.
Papalitan ni Fr. Ocon si Fr. Victor de Jesús, SJ, na nagsilbi bilang national director mula pa noong 2020.
Kilala ang Pope’s Worldwide Prayer Network sa kampanyang Pray with the Pope, kung saan ibinabahagi ng Santo Papa ang kanyang buwanang intensiyon sa panalangin sa pamamagitan ng mga video message.
Itinatag ang samahan noong 1844 bilang Apostleship of Prayer at kalaunan ay pinalitan ang pangalan nito bilang Pope’s Worldwide Prayer Network. Pormal naman itong kinilala bilang isang pundasyong Vaticano noong 2020.
Layunin ng network na pag-isahin ang mga Katoliko sa iba’t ibang panig ng mundo sa pamamagitan ng panalangin at malasakit sa sangkatauhan, bilang bahagi ng misyon ni Kristo.




