196 total views
Hinikayat ng Simbahan ang lahat ng sangay ng lipunan na ipadama sa mga nangingibang bayan lalu na ang mga Overseas Filipino Workers ang awa at habag ng ebanghelyo.
Sinabi ni Pasig Bishop Mylo Hubert Vergara, vice-chairman ng CBCP Episcopal Commission on Migrants and Itinerant People sa pagdiriwang ng national migrants Sunday na mahalagang paalala ito na maipadama sa mga O-F-W at sa mga nangingibang bayan na mayroon silang makakapitan sa oras ng kanilang mga paghihirap at pagdurusa sa paglayo sa kanilang pamilya at sa sariling bayan.
“Napakaliwanag naman ng ating tema ngayong national migrants Sunday, yung tugon and response to our migrants and refugees to the gospel of mercy, kaya nga napakaganda ng mensahe ni Cardinal Tagle kung papanu yung hamon natin ngayong unang Linggo ng kuwaresma ay maging instrumento tayo ng awa o habag lalu na sa mga migranteng Filipino, pati mga refugees na hindi natin kilala mula sa iba’t-ibang parte ng mundo na kung mapapanasin po natin ay marami din po silang dinadaanang pagsubok at mga tukso.” pahayag ni Bishop Vergara sa Radio Veritas.
Inihayag ng Obispo na mahalaga na palagiang ipanalangin na madama nila ang awa at habag ng Diyos sa pamamagitan ng tulong ng pamahalaan, Simbahan at iba pang sangay ng lipunan sa gitna ng kanilang nararanasang mga paghihirap, pang-aabuso at pananamantala sa kanilang kahinaan.
“Ito po yung mensahe, si Hesus ay tinukso ng diyablo sa disyerto kung isipin natin yung larawan marami sa ating mga kababayanag Filipino na mga OFW nakakalat sa buong mundo lalu na sa middile east kung saan nandoon ang disyerto at ang dami nilang dinadaaanan minsan nadating na rin sa kanilang buhay na pagal na pagal sila, na pagod na pagod sila dala ng ng maraming sinasabing curcumstancia na negatibo, kalungkutan malayo sila sa kanilang mga pamilya pati na rin na yung karanasan nila doon na maaari silang inaabuso, kakulangan ng mga pangangailangan, lahat yan samut samut at siguro ang hamon po sa atin na ipagdasal natin sila at pati yung ibat ibang sangay ng Simbahan at pamahalaan sana magtulong tulong para ang ebanghelyo ng habag ay maihatid natin at alam naman natin na tayo lahat ay gagamitin ng Diyos para ipadama natin ang pag-ibig sa kanila.” pahayag ng Obispo.
Samantala mula sa datus ng Migrante International, umaabot na sa 10.5-milyung Filipino ang kabuuang bilang ng nagta-trabaho sa may 200 mga bansa sa buong mundo.(Riza Mendoza)
