310 total reads
Ika-26 na Linggo sa Karaniwang Panahon (A)
Ezekiel 18, 25-28
Salmo 24, 4kb-5. 6-7. 8-9
Poon, iyong gunitain
wagas mong pag-ibig sa ‘kin.
Filipos 2, 1-11
Mateo 21, 28-32
Twenty-sixth Sunday in Ordinary Time (Green)
National Seafarer’s Day
Migrant’s Sunday
UNANG PAGBASA
Ezekiel 18, 25-28
Pagbasa mula sa aklat ni propeta Ezekiel
Ito ang sinasabi ng Panginoon: “Marahil ay sasabihin ninyong hindi tama itong ginagawa ko. Makinig kayo, mga Israelita: Matuwid ang aking tuntunin, ang pamantayan ninyo ang baluktot. Kapag ang isang taong matuwid ay nagpakasama, mamamatay siya dahil sa kasamaang ginawa niya. At ang masamang nagpakabuti at gumawa ng mga bagay na matuwid ay mabubuhay. Dahil sa pagtalikod sa nagawa niyang kasamaan noong una, mabubuhay siya, hindi mamamatay.”
Ang Salita ng Diyos.
SALMONG TUGUNAN
Salmo 24, 4kb-5. 6-7. 8-9
Poon, iyong gunitain
wagas mong pag-ibig sa ‘kin.
Ang kalooban mo’y ituro, O Diyos,
ituro mo sana sa aba mong lingkod;
ayon sa matuwid, ako ay turuan,
ituro mo, Poon, ang katotohanan;
Tagapagligtas ko na inaasahan.
Poon, iyong gunitain
wagas mong pag-ibig sa ‘kin.
Poon, gunitain, pag-ibig mong wagas,
at ang kabutihang noon pa’y nahayag.
Patawarin ako sa pagkakasala,
sa kamalian ko nang ako’y bata pa;
pagkat pag-ibig mo’y hindi magmamaliw,
ako sana, Poon, ay alalahanin!
Poon, iyong gunitain
wagas mong pag-ibig sa ‘kin.
Mabuti ang Poon at makatarungan,
sa mga salari’y guro at patnubay;
sa mababang-loob siya yaong gabay,
at nagtuturo ng kanyang kalooban.
Poon, iyong gunitain
wagas mong pag-ibig sa ‘kin.
IKALAWANG PAGBASA
Filipos 2, 1-11
Pagbasa mula sa sulat ni Apostol San Pablo sa mga taga-Filipos
Mga kapatid:
Nagbibigay ba sa inyo ng kasiglahan ang buhay na nakaugnay kay Kristo? Naaaliw ba kayo ng kanyang pag-ibig? May pagkakaisa ba kayo sa Espiritu Santo? Kayo ba’y may nadaramang hangarin na tumulong sa iba? Kung gayon, lubusin ninyo ang aking kagalakan – maghari sa inyo ang pagkakasundo, mabuklod kayo ng iisang pag-ibig at maging isa kayo sa puso’t diwa. Huwag kayong gagawa ng anumang bagay dahil lamang sa hangad ninyong matanyag, bagkus magpakababa kayo at huwag ipalagay na kayo’y mabuti kaysa iba. Ipagmalasakit ninyo ang kapakanan ng iba, hindi lamang ang sa inyong sarili. Magpakababa kayo tulad ni Kristo Hesus:
Na bagamat siya’y Diyos,
hindi nagpilit na manatiling kapantay ng Diyos,
bagkus hinubad niya ang lahat ng katangian ng pagka-Diyos,
nagkatawang-tao at namuhay na isang alipin.
Nang maging tao,
siya’y nagpakababa at naging masunurin hanggang kamatayan,
Oo, hanggang kamatayan sa krus.
Kaya naman, siya’y itinampok ng Diyos at binigyan ng pangalang higit sa lahat ng pangalan.
Anupa’t ang lahat ng nilalang na nasa langit, nasa lupa, nasa ilalim ng lupa ay maninikluhod
At sasamba sa kanya.
At ipapahayag ng lahat na si Hesukristo ang Panginoon,
sa ikararangal ng Diyos Ama.
Ang Salita ng Diyos.
o kaya: Maikling Pagbasa
Filipos 2, 1-5
Pagbasa mula sa sulat ni Apostol San Pablo sa mga taga-Filipos
Mga kapatid:
Nagbibigay ba sa inyo ng kasiglahan ang buhay na nakaugnay kay Kristo? Naaaliw ba kayo ng kanyang pag-ibig? May pagkakaisa ba kayo sa Espiritu Santo? Kayo ba’y may nadaramang hangarin na tumulong sa iba? Kung gayun, lubusin ninyo ang aking kagalakan — maghari sa inyo ang pagkakasundo, mabuklod kayo ng iisang pag-ibig at maging isa kayo sa puso’t diwa. Huwag kayong gagawa ng anumang bagay dahil lamang sa hangad ninyong matanyag, bagkus magpakababa kayo at huwag ipalagay na kayo’y mabuti kaysa iba. Ipagmalasakit ninyo ang kapakanan ng iba, hindi lamang ang sa inyong sarili. Magpakababa kayo tulad ni Kristo Hesus.
Ang Salita ng Diyos.
ALELUYA
Juan 10, 27
Aleluya! Aleluya!
Ang tinig ko’y pakikinggan
ng kabilang sa ‘king kawan;
ako’y kanilang susundan.
Aleluya! Aleluya!
MABUTING BALITA
Mateo 21, 28-32
Ang Mabuting Balita ng Panginoon ayon kay San Mateo
Noong panahong iyon, sinabi ni Hesus sa mga punong saserdote at mga matatanda ng bayan: “Ano ang palagay ninyo rito? May isang tao na may dalawang anak na lalaki. Lumapit siya sa nakatatanda at sinabi, ‘Anak, lumabas ka at magtrabaho sa ubasan ngayon.’ ‘Ayoko po.’ tugon niya. Ngunit nagbago ang kanyang isip at siya’y naparoon. Lumapit din ang ama sa ikalawa at gayun din ang kanyang sinabi. ‘Opo’ tugon nito, ngunit hindi naman naparoon. Sino sa dalawa ang sumunod sa kalooban ng kanyang ama?” “Ang nakatatanda po,” sagot nila. Sinabi sa kanila ni Hesus, “Sinasabi ko sa inyo: ang mga publikano at masasamang babae’y mauuna pa sa inyong pasakop sa paghahari ng Diyos. Sapagkat naparito sa inyo si Juan at ipinakilala ang matuwid na pamumuhay, at hindi ninyo siya pinaniwalaan. Ngunit pinaniwalaan siya ng mga publikano at ng masasamang babae. Nakita ninyo ito, subalit hindi pa rin kayo nagsisi at naniwala sa kanya.”
Ang Mabuting Balita ng Panginoon.
PANALANGIN NG BAYAN
Ika-26 na Linggo sa Karaniwang Panahon (A)
Ang Diyos ay hindi tumitingin sa panlabas na anyo o sa mga hungkag na salita, kundi sa pusong tunay na nagbabalik-loob sa Kanya. Hindi Niya hinahanap ang ating mga pangako bagkus ang pagsunod na tulad kay Kristo. Nagtitiwala sa Kanyang awa, tayo ay manalangin. Panginoon, dinggin Mo ang aming panalangin.
Panginoon, dinggin Mo kami.
Para kay Papa Leon XIV, sa mga obispo at pari—nawa’y maisabuhay nila ang kanilang ipinapangaral nang may kababaang-loob at pag-ibig. Manalangin tayo.
Para sa ating mga pinuno—nawa’y magkaroon sila ng lakas ng loob na ituwid ang mali at maglingkod nang may katarungan. Manalangin tayo.
Para sa ating Parokya—nawa’y talikuran natin ang pagmamayabang at maging handang magbago at maglingkod. Manalangin tayo.
Para sa mga maysakit—nawa’y maranasan nila ang kaaliwan ng awa at pag-ibig ng Diyos. Manalangin tayo.
Diyos naming mapagmahal, tinatawag Mo kami hindi lamang upang magasabi ng ‘oo’, kundi upang isabuhay ito. Ipagkaloob mo sa amin ang biyaya ng tunay na pagbabalik-loob upang matupad namin ang Iyong kalooban araw-araw. Hinihiling naming ito sa pamamagitan ni Kristo, aming Panginoon. Amen.
