222 total views
Handang-handa ang Caritas Manila sa pagpasok ng panahon ng tag-ulan at pinangangambahang pagtama ng La Nina phenomenon sa Pilipinas.
Sa isinagawang Caritas Network Meeting sa Diocese of Novaliches, tiniyak ng Social Arm ng Archdiocese of Manila na may nakahanda silang mga relief goods at relief items sa anumang emergency situations na idudulot ng tag-ulan.
Binigyan diin Caritas Manila Executive Director at Radio Veritas 846 President Father Anton CT Pascual na tutugon ang kanilang hanay sa loob ng 24-oras sa panahon ng pangangailangan ng mga apektadong na apektado ng kalamidad.
“Importante na we can respond within 24 hours” wika ni Fr.Pascual
Sa datos ng Caritas Manila Disaster Risk Reduction and Management Program o Caritas Damayan, mayroon silang naka-imbak na mahigit sa isang libong relief goods, 934 na hygiene kits, 500 mga trapal at halos isang libong thermos na nakahanda para sa anumang pangangailangan kapag may naganap na kalamidad.
Inaasahan na dahil sa pagpasok ng panahon ng tag-ulan ay posibleng makaranas ng 7 hanggang 17 mga bagyo ang bansa bago matapos ang taon.
Sa kasalukuyan, pina-igting na ng Caritas Manila ang pagpapalaganap ng kaalaman sa paghahanda sa lindol, mga kalamidad sa pamamagitan ng pamamahagi ng mga informational flyers at informational video sa pakikipagtulungan ng Radyo Veritas.
Magugunitang ang Metro Manila ay nahaharap sa banta ng malakas na lindol dahil sa west valley fault na maaring magdulot ng pinsala sa may 3.15 milyong katao.
