1,042 total reads
Sinuportahan ng Church People Workers Solidarity o CWS ang ‘Cagayan Valley 11’ na mga human rights defender na kinasuhan ng paglabag sa Terrorism Financing Law.
Iginiit ng C-W-S na hindi dapat ituring na terorismo ang aktibismo at dapat mawakasan na ang mga kasong tinawag nitong “trumped-up charges” laban sa mga tagapagtanggol ng karapatang pantao.
Nanawagan ang C-W-S na ipawalang bisa ang mga kaso laban sa Cagayan Valley 11, na mga environmental defenders sa Nueva Vizcaya at iba pang political detainees.
Hinimok din ng CWS ang Kongreso na ipawalang-bisa ang Republic Act No. 10168 at isulong ang mga batas para sa repormang agraryo, pangangalaga sa kalikasan at katarungang panlipunan.
Binigyan-diin ng C-W-S na “ACTIVISM IS NOT TERRORISM” at hinimok ang publiko na ipaglaban ang karapatang pantao at makiisa sa Cagayan Valley 11.
Naunang kinundena ng Umaddang Cagayan Valley Para ti Karbengan o “Cagayan Valley Moves Forward for Rights – Cagayan Valley Advances for Rights”, ang paggamit sa Republic Act No. 10168 o Terrorism Financing Prevention and Suppression Act of 2012 laban sa 11 human rights defenders.
Naninindigan at ipinaabot ng grupo ang suporta sa Cagayan valley 11 na sina Agnes Mesina, Isabelo Adviento, Cita Managuelod, Jackie Valencia, Deo Montesclaros, Renato Gameng, Mafel Macalanda, Anne Marie Pascual, Nelson Escalante, Walter Villegas at Jhames Paredes.
Sinabi ng grupo na hindi makatarungan ang ginawa ng gobyerno na“weaponization” of terrorism financing para supilin ang mga human rights defender na ihayag ang laganap na paglabag sa karapatang pantao sa Cagayan valley.
Binatikos ng grupo ang patuloy na ‘criminalization ‘ sa mga aktibistang nagsusulong ng karapatan ng mga magsasaka, pangangalaga sa kalikasan at karapatang pantao.
Inilantad din ng grupo ang military activities sa Cagayan valley, pang-aagaw sa lupa, suliranin sa pagmimina at laganap na kahirapan dulot ng El Niño phenomenon sa sektor ng agrikultura.
Unang hinimok ni Pope Francis sa kaniyang Ensiklikal na Laudato Si ang sanlibutan na kagyat na pangalagaan ang kalikasan na nag-iisang tahanan ng sangkatauhan.
