896 total reads
Aabot sa 1,685 pangalan na ginamit bilang recipients ng confidential funds ang walang nakitang birth, marriage o death record sa Philippine Statistics Authority o PSA.
Ito ang inilahad ni prosecution counsel Atty. Mae Divinagracia sa impeachment trial ni Vice President Sara Duterte bilang bahagi ng ebidensiya sa Article I ng kaso.
Ayon sa prosecution, sinuri ng PSA ang 2,669 pangalan mula sa liquidation records ng Office of the Vice President o OVP at Department of Education o DepEd para sa 2022 at 2023.
Sa bilang na ito, 1,685 pangalan ang walang nakitang katumbas na record sa PSA—kabilang ang 1,287 mula sa OVP at 398 mula sa DepEd, kabilang na ang pangalan ni Mary Grace Piattos.
Si PSA Assistant National Statistician Marizza Grande ang ikasampung testigo ng prosecution.
Sinimulan na niya ang pagpapaliwanag sa proseso ng PSA sa pag-verify ng mga pangalan at civil registry records.
Ayon kay Atty. Divinagracia, mayroon ding 37 pangalan na tumugma sa records ng mga taong patay na noong natanggap ang pondo.
Samantala, 25 pangalan naman ang tumugma sa records ng mga bata, kabilang ang tatlong wala pang tatlong taong gulang.
Ipinrisinta ng prosecution ang mga datos bilang bahagi ng pagkuwestiyon nito sa mga acknowledgment receipts na ginamit sa liquidation ng confidential funds.
Gayunman, kinuwestiyon ng depensa ang ilang bahagi ng testimonya ni Grande, lalo na ang mga konklusyon na iniuugnay sa mga dokumentong iprinisinta ng prosecution.
Sinabi naman ng prosecution na hindi kailangang iisang testigo lamang ang magpatunay sa lahat ng bahagi ng kanilang kaso at dapat tingnan ang testimonya ni Grande kasama ng iba pang ebidensiyang una nang naiharap sa pagdinig.
