1,319 total reads
Nanawagan si Pope Leo XIV sa mga pinuno ng pamahalaan at iba pang sektor ng lipunan na higit na pangalagaan ang kasal at pamilya, na itinuturing na pundasyon ng isang matatag na lipunan.
Sa kanyang general audience sa St. Peter’s Square sa Vatican, ipinaliwanag ng Santo Papa na ang maayos na kalagayan ng pamilya ay mahalaga sa kapakanan ng bawat tao at ng buong lipunan.
“The mutual self-giving of man and woman, such that ‘they are no longer two but one flesh’, underlies the requirement for ‘total fidelity’ and the ‘unbreakable oneness’ of the spouses, finding vivid expression in the procreation and upbringing of children,” ayon kay Pope Leo.
Ayon kay Pope Leo, mas kailangan ngayon ang mga konkretong hakbang upang mapangalagaan ang pagsasama ng mag-asawa at matiyak ang kapakanan ng kanilang mga anak.
Binigyang-halaga rin niya ang katapatan at matibay na ugnayan ng mag-asawa, na dapat nakabatay sa pagmamahalan, paggalang at kusang-loob na pagbibigay ng sarili para sa isa’t isa.
Ipinaliwanag ng Santo Papa na ang tunay na pagmamahalan ay hindi lamang nakabatay sa pisikal na atraksyon, kundi sa buong pusong pag-aalaga at pagsuporta sa isa’t isa sa lahat ng yugto ng buhay.
Binigyang-diin din niya ang pananagutan ng mga magulang sa pagkakaroon at pagpapalaki ng mga anak, gayundin ang pangangalaga sa buhay mula sa paglilihi.
Muling iginiit ni Pope Leo ang paninindigan ng Simbahang Katolika laban sa aborsiyon at pagpatay sa mga sanggol, at hinimok ang mga mag-asawa na gumawa ng mga pagpapasya para sa kapakanan ng kanilang pamilya alinsunod sa kanilang konsensiya at mga aral ng Simbahan.
Ang mensahe ay bahagi ng serye ng mga katuruan ng Santo Papa tungkol sa mga dokumento ng Ikalawang Konsilyo Vaticano, partikular ang Gaudium et Spes, na tumatalakay sa ugnayan ng Simbahan at ng makabagong mundo.
Samantala, ito ang unang general audience ni Pope Leo matapos maoperahan sa baga noong October 13 at makalabas sa ospital sa Roma noong October 17.
