Sabado, Hulyo 18, 2026

SHARE THE TRUTH

 7,793 total reads

Sabado ng Ika-15 Linggo sa Karaniwang Panahon (II)

o kaya Paggunita sa Mahal na Birheng Maria tuwing Sabado

Mikas 2, 1-5
Salmo 9, 22-23. 24-25. 28-29. 35

Poon, huwag pabayaan
ang mga nahihirapan.

Mateo 12, 14-21

Saturday of the Fifteenth Week in Ordinary Time (Green)

or Optional Memorial of the Blessed Virgin Mary on Saturday (White)

UNANG PAGBASA
Mikas 2, 1-5

Pagbasa mula sa aklat ni propeta Mikas

Sumpain ang mga nagbabalak ng kasamaan sa buong magdamag at maagang bumabangon upang ito’y isagawa. Kinakamkam nila ang lupa ng may lupa, inaagaw ang bahay na kanilang magustuhan. Hinahalughog nila ang bahay at sinasamsam ang mga ari-arian ng mga tao.

Kaya nga, sinasabi ng Panginoon: “May inihahanda akong parusa sa sambahayang ito, at walang makapipigil sa akin. Hindi na kayo muling magmamataas at magpapalalo pagkaraan ng araw ng inyong kaparusahan. Sa araw na iyon ay uuyamin kayo ng inyong mga kaaway at aawitan ng punebre ng kasawian: ‘Ganap na kaming nalipol; inalis na ng Diyos ang lupaing bahagi ng aming sambahayan at ibinigay sa mga bumihag sa amin.’”

Kaya’t wala na kayong mamanahing lupa na sa araw na yao’y hahatiin ng Panginoon para sa kanyang mga hinirang.

Ang Salita ng Diyos.

SALMONG TUGUNAN
Salmo 9, 22-23. 24-25. 28-29. 35

Poon, huwag pabayaan
ang mga nahihirapan.

O Panginoong Diyos, bakit ako nilayuan?
Sa panahon ng bagabag, bakit nagtatago ikaw?
Inaapi ang mahirap ng palalo’t tampalasan,
nawa’y ito ang mahuli sa patibong nilang umang.

Poon, huwag pabayaan
ang mga nahihirapan.

Ang masama’y naghahambog sa buktot na nilalayon,
tinutuya ng masakim, sinusumpa ang Panginoon.
Sa kanyang paghahambog, ganito ang kanyang bulong:
“Hindi ako papansinin nitong Diyos na huhukom,”
ganito ang iniisip sa tuwina niyong buhong.

Poon, huwag pabayaan
ang mga nahihirapan.

Sinungaling magsalita, lapastanga’t mapagbanta,
at masakit kung mangusap, masama ang kanyang dila.
Sa liblib ay nangungubli, nag-aabang, at ang nasa’y
patayin ang walang sala’t walang malay na nilikha.

Poon, huwag pabayaan
ang mga nahihirapan.

Kita mo ang nalulungkot, pati na ang nagdurusa,
ika’y laging nakahanda sa pagtulong sa kanila;
ang wala nang maasahan ay sa iyo nagpupunta,
pagkat di ka nagkakait ng tulong mo sa kanila.

Poon, huwag pabayaan
ang mga nahihirapan.

ALELUYA
2 Corinto 5, 19

Aleluya! Aleluya!
Pinagkasundo ni Kristo
ang Diyos at mga tao;
kaya’t napatawad tayo.
Aleluya! Aleluya!

MABUTING BALITA
Mateo 12, 14-21

Ang Mabuting Balita ng Panginoon ayon kay San Mateo

Noong panahong iyon, umalis ang mga Pariseo at nag-usap-usap kung paano ipapapatay si Hesus.

Alam ito ni Hesus kaya’t umalis siya roon. Maraming sumunod sa kanya at pinagaling niya ang lahat ng maysakit, ngunit mahigpit niyang ipinagbilin sa kanila na huwag ipamamalita ang tungkol sa kanya. Nangyari ito upang matupad ang sinabi ni Propeta Isaias:

“Naririto ang lingkod ko na ako rin ang humirang,
minamahal ko nang labis, lubos kong kinalulugdan;
ang banal kong Espiritu sa kanya ay ibibigay,
sa lahat ng mga bansa ibabadha’y katarungan.
Hindi siya makikipagtalo, mahinahon kung mangusap,
ang tinig niya sa lansanga’y tinig lamang na paanas;
hindi niya puputulin yaong tambong nakahapay,
ni hindi rin papatayin ang umaandap na ilawan,
hanggang itong katarunga’y mapagtagumpay niyang ganap;
at ang pag-asa ng tao sa kanya ay ilalagak.”

Ang Mabuting Balita ng Panginoon.

PANALANGIN NG BAYAN
Ika-15 Linggo sa Karaniwang Panahon
Sabado

Bumaling tayo sa Diyos, ang ating mahabaging Ama, siyang hindi tumatalikod sa mga mahihirap at mga nangangailangan.

Panginoon, dinggin Mo ang aming panalangin.
o kaya
Ama ng mga dukha at mahihina, maawa ka sa amin.

Ang Simbahan nawa’y makita bilang tahanan para sa mga mahihina at mga dukha, manalangin tayo sa Panginoon.

Ang mga lingkod publiko nawa’y tunay na maglingkod sa kanilang pinamumunuan nang may matuwid na hangarin, manalangin tayo sa Panginoon.

Ang mga nagtalaga ng kanilang mga sarili sa kabanalan nawa’y ibigay ang buong buhay nila sa Diyos at sa Simbahan sa pamamagitan ng kanilang pagiging saksi, manalangin tayo sa Panginoon.

Ang mga maysakit at nagdurusa nawa’y tingnan natin nang may habag at unawa, manalangin tayo sa Panginoon.

Ang mga namatay nawa’y makadama ng mapagligtas na kapangyarihan ng Diyos, manalangin tayo sa Panginoon.

Mahabaging Ama, gawin mo kaming tunay na mga lingkod ng iyong pagmamahal. Maging katulad nawa kami ng iyong Anak na dumating hindi upang paglingkuran kundi upang maglingkod. Hinihiling namin ito sa pamamagitan ni Kristong aming Panginoon. Amen.

Special treatment?

 86,852 total reads

Mga Kapanalig, isa si dating House Speaker at Leyte Representative Martin Romualdez sa mga sinasabing pangunahing personalidad na sangkot sa flood control scandal na gumimbal sa ating lahat noong isang taon. 

Noong Setyembre lang siya idinetine matapos sampahan ng kasong plunder ng Office of the Ombudsman. Lampas pitong bilyong piso ang halaga ng kickback na natanggap niya umano mula sa mga maanomalyang flood control at infrastructure projects. Hindi siya maaaring magpiyansa kaya kailangan siyang ilagay sa bilangguan habang dinidinig ang kanyang kaso.

Pero hindi katulad ng mga ordinaryong mamamayan na may kinahaharap na kaso, nagkaroon muna siya ng pagkakataong manatili sa ospital kung saan inihain ang kanyang warrant of arrest. May medical condition daw siya noon na kailangang tutukan ng mga doktor. Sa pamamagitan ng kanyang mga abogado—bagay na wala rin ang mga ordinaryong tao na kinakasuhan—nagawa niyang manatili sa ospital sa loob ng isang linggo. Iniutos ng Sandiganbayan na ilipat siya sa New Quezon City Jail at sumailalim sa medical evaluation sa UP-PGH; idineklara siyang “clinically stable” at kayang manatili sa regular na bilangguan.

Kamakailan, natuklasang may personal assistant ang dating House Speaker. Pinayagan daw ito for humanitarian reasons, partikular ang pangangailangang tutukan ang kanyang “unstable mental condition.” Kulang daw kasi ang mga tauhan ng pasilidad para tutukan ang mga nasa kanilang pangangalaga. Lumabas din sa inspeksyon ng Sandiganbayan na walang CCTV cameras na malapit sa selda ni Congressman Romualdez. Kumalat din ang mga balitang sinasadyang patayin ang kuryente para hindi mahagip ng mga CCTV cameras ang paglabas ni Congressman Romualdez gamit ang ambulansya ng piitan.

Kung bibisita kayo, mga Kapanalig, sa ating mga bilangguan, makikita ninyo kung gaano kalayo ang kalagayan ni Congressman Romualdez at iba pang tinatawag na high-profile inmates sa mga ordinaryong persons deprived of liberty (o PDL). 

Nagsisiksikan ang mga ordinaryong PDLs sa isang dormitoryo na dapat ay para lamang sa 10 hanggang 20 na inmates, pero umaapaw ang mga ito dahil sa kakulangan ng espasyo. 

Wala silang choice kundi ang umasa sa kung anong meron sa kanilang clinic o sa kapwa nila bilanggo para sa pangangalagang medikal. Dahil hindi ganoon kadali ang access sa ambulansya at ospital, marami sa mga maysakit ang lumalala ang kanilang kondisyon sa loob ng kulungan. Iba pa ang kalusugang pangkaisipan o mental health na talaga namang napapabayaan na.  

Hindi sila pinapayagang magkaroon ng personal assistants o dalawin sa mas mahabang panahon. Tila dumadaan sa butas ng karayom ang mga mahal sa buhay na gusto silang bisitahin. Wala rin silang mga legal team na magtitiyak na napangangalagaan ang kanilang mga karapatan at nasusubaybayan ang kanilang kaso.

Bago pa man mapunta sa bilangguan, ang mga ordinaryong PDL ay hinuhuli agad at inilalagay sa mga piitan kahit pa maliit ang krimen na kanilang ginawa o kahit pa may sakit. Walang hospital arrest.

May mga karapatang pantao ang lahat ng mga PDL. Ito ang dahilan kung bakit nararapat pa rin silang tratuhin nang maayos kahit pa humaharap sa proseso ng pagpapanagot sa batas. Pero kung naibibigay sa isang high-profile inmate ang isang maayos na kondisyon sa kulungan, bakit hindi ito magawa sa lahat ng mga bilanggo? Pinahahalagahan sa mga panlipunang turo ng Simbahan ang katarungan, at hinihingi ng katarungan na ang batas ay dapat ipinatutupad ng pantay sa lahat—walang pinapaboran, walang kinikilingan, walang isinasaalang-alang na yaman, kapangyarihan, at katayuan sa buhay. Ang special treatment sa mga bilangguan, gaya ng pahiwatig sa Deuteronomio 16:19, ay “[pagpilipit sa] katarungan.”

Mga Kapanalig, dahil sa kanilang dignidad, walang bilanggo ang dapat magdusa sa kalunos-lunos na kalagayan sa mga kulungan—dating speaker ka man o ordinaryong bilanggo.

Sumainyo ang katotohanan.

Bayan bago banyaga

 172,262 total reads

Mga Kapanalig, nagsimula na ang 49th ASEAN Summit sa Pilipinas. Malinis na mga kalsada, maayos na paligid, at maaliwalas na tanawin ang sumalubong sa mahigit 20 na pinuno ng mga bansa na dumadalo sa pagtitipon. Pero ang malinis na kalsada, maayos na paligid, at mga maaliwalas na tanawing ito ay nangailagan ng pagsasara ng mga negosyo, pagkawala ng kabuhayan, at pagtatago sa mga suliraning patuloy na kinakaharap ng mga Pilipino.

Bilang bahagi ng mga paghahanda, nagsagawa ng clearing operations ang mga lokal na pamahalaan ng Parañaque at Pasay sa mga kalsadang dadaanan ng mga bisita. Pinaalis at pinagbawalang magtinda ang ilang street vendors, habang ipinasara naman ang ilang maliliit na tindahan at kainan. Dahil dito, pansamantalang nawalan ng kabuhayan ang mga vendors, may-ari ng negosyo, at mga manggagawang umaasa sa arawang kita. Para sa kanila, bawat araw na hindi nakapagtatrabaho ay katumbas ng sahod o kita na hindi maiuuwi sa kanilang pamilya. Sa panahong patuloy na tumataas ang presyo ng mga bilihin, malaking dagok ito sa mga pamilyang sapat lamang ang kinikita para maitawid ang pang-araw-araw na pangangailangan.  

Ang higit na kapansin-pansin, sa halip na linisin at ayusin ang paligid ng ilang negosyo, tinakpan pa ang mga ito ng malalaking harang na may larawan ng mga obra ng ating mga national artists. Maging ang mga maruruming ilog at mga informal settlements na tanaw mula sa ilang kalsadang dadaanan ng mga dayuhang bisita ay ikinubli sa likod ng mga pinagdugtung-dugtong na plywood.

Malinaw na layunin ng mga harang na ito na itago ang mga problemang kinakaharap ng bansa. Pagkatapos ng ASEAN Summit, aalis din ang mga bisita at aalisin din ang mga harang, pero mananatili ang mga maralitang komunidad, maruruming ilog, at iba pang suliraning hindi naman nalutas. 

Kaya ang tanong natin: bakit hindi na lang pangmatagalang solusyon ang gawin sa mga itinuturing na pangit sa mata ng publiko?  

Sa halip na itago ang mga ito kapag may mga dayuhang bisita, bakit hindi na lang pagtuunan ng pansin ang disenteng pabahay, malinis na mga daluyan ng tubig, at permanenteng lugar para sa mga nasa impormal na sektor ng ekonomiya? 

Hindi dapat pagandahin ang Pilipinas para lamang mag-iwan ng magandang impresyon sa mga lider ng ibang bansa. Mas mahalagang makita at maramdaman mismo ng mga Pilipino ang pag-unlad. Hindi dapat pansamantala lamang ang mga hakbang upang maging maayos ang ating mga komunidad. Dapat itong makita at maramdaman sa araw-araw, may mga dayuhang bisita man o wala.

Sa Catholic social teaching na Rerum Novarum, sinasabing tungkulin ng isang ama na tiyakin ang kapakanan at pangangailangan ng kanyang pamilya. Hindi niya dapat pabayaan ang kanyang pamilya upang bigyang-kasiyahan ang ibang tao. Ganoon din ang pananagutan ng mga namumuno sa ating bansa. Bilang mga halal na opisyal na pinagkatiwalaan ng mamamayan, dapat nilang tiyaking ang kanilang mga desisyon at programa nila ay tunay na nagsusulong sa kapakanan ng mga Pilipino. Hindi sapat na maipakita nilang maayos ang bansa sa paningin ng ibang mga bansa kung hindi naman ito nararamdaman ng sarili nilang mamamayan.

Mga Kapanalig, mahalagang maipakita natin sa mga karatig-bansa ang isang Pilipinas na maganda makitungo at handang makipagtulungan sa lahat. Pero higit na mahalagang maipakita natin ang isang pamahalaang naglilingkod at nagmamalasakit sa sarili nitong mamamayan. Sa Mateo 6:1, pinaaalalahanan tayo ni Hesus na huwag gumawa ng mabuti para purihin lang ng ibang tao. Gaya ng hamon ni Hesus, hamunin din natin ang ating mga pinuno: gawin ang tama hindi lamang kapag may mga dayuhang nakatingin, kundi lalo na kapag ang tanging nakakakita sa kanilang ginagawa ay ang mga Pilipinong araw-araw na umaasa sa kanilang paglilingkod.

Sumainyo ang katotohanan.

 

Magparehistro na para makaboto sa 2028!

 236,103 total reads

Mga Kapanalig, pwede nang magparehistro ang mga botante para sa 2028 national at local elections hanggang sa ika-30 ng Hulyo, 2027.

Maaaring magparehistro ang mga Pilipino na hindi bababa sa 18 taóng gulang sa araw ng halalan sa ika-8 ng Mayo, 2028. Kailangan ding nakatira sila sa Pilipinas nang hindi bababa sa isang taon at sa lugar kung saan nila planong bumoto nang hindi bababa sa anim na buwan bago ang halalan. Bukás ang mga tanggapan ng Comelec mula Martes hanggang Biyernes, gayundin sa ilang piling Sabado at holiday.

Hindi lamang mga unang beses na boboto ang dapat magtungo sa Comelec. Kailangan ding mag-asikaso ng kanilang record ang mga nais na buhayin muli ang kanilang rehistro matapos hindi makaboto sa dalawang magkasunod na halalan, lumipat ng lugar ng pagbobotohan, magwasto ng impormasyon, o mag-update ng pangalan. May ilang legal na dahilan na maaaring maging hadlang sa pagpaparehistro, kaya mahalagang tingnan ang mga requirements at mga paalala sa website ng Comelec.

Bakit nga ba mahalagang magparehistro at bumoto? 

Sa pamamagitan ng ating boto, nagkakaroon tayo ng boses sa mga isyung nakaaapekto sa ating lipunan. Ang mga pulitikong inihahalal natin ang nagpapasya kung paano gagamitin ang pondo ng bayan, kung paano pangangalagaan ang mga lupain ng mga katutubo, at kung paano pamamahalaan ang ekonomiya. Nakasalalay sa kanilang mga desisyon kung mapoprotektahan o lalo pang magdurusa ang mahihirap.

Ayon sa Kawikaan 29:2, “Kapag matuwid ang namamahala, bayan ay nagsasaya, ngunit tumatangis ang bayan kung ang pinuno ay masama.” May malaking epekto sa buhay ng mga mamamayan ang uri ng mga pinunong kanilang inihahalal. Kaya hindi dapat basta-basta ang pagpili natin. Kailangang suriin ang kanilang mga nagawa, paninindigan, at mga patakarang isinusulong, sa halip na magpadala sa kasikatan o pangakong too good to be true, ‘ika nga.

Ipinakita rin ni Pope Leo XIV ang kahalagahan ng pagboto nang gampanan niya ang tungkuling ito sa katatapos na midterm elections sa Amerika. Sa midterm elections ng Amerika, nakita natin kung paano maaaring gamitin ng mga botante ang kanilang kapangyarihan upang ipahayag ang pagkadismaya sa pamahalaan. Naging mahalagang usapin sa halalan ang mga patakaran ng administrasyon ni Pangulong Donald Trump, kabilang ang digmaan na sinimulan niya sa Middle East. Ipinakita nito na hindi permanente ang kapangyarihan ng mga namumuno. Maaaring baguhin ng mga mamamayan ang komposisyon ng kanilang pamahalaan sa pamamagitan ng kanilang mga boto. 

Magagawa rin ba natin ito sa 2028?

Ipinaalala ni Pope Leo XIV: “the political community exists for the sake of the common good.” Dapat nakatuon sa kapakanan ng nakararami ang mga desisyon ng gobyerno at ng mga namumuno. Pero sa Pilipinas, tila naging karaniwan na lamang ang korapsyon at pang-aabuso sa kapangyarihan. Nakita natin ito sa mga iskandalo tulad ng pork barrel scam at flood control scandal, gayundin sa patuloy na pamamayani ng mga political dynasties. Hindi dapat maging normal ang ganitong kalakaran. Kailangang panagutin ang mga pinunong inuuna ang sariling interes kaysa sa kapakanan ng taumbayan.

Mga Kapanalig, sabi ng makata at aktibistang si Maya Angelou na ang pagboto ay ang “great equalizer.” Sa pagboto, bawat mamamayan ay may pagkakataong makilahok at manawagan ng pagbabago. Magkasimbigat ang boto ng isang mayamang may-ari ng lupa at ng isang masipag na magsasaka. Magkasimbigat ang boto ng isang pulitiko at ng isang estudyanteng unang beses boboto. Kaya huwag nating sayangin ang pagkakataong ito! Magparehistro tayo at pag-isipang mabuti kung sino ang pagkakatiwalaan nating mamuno. Kung nais natin ng mas mabubuting lider, mas maayos na mga patakaran, at mas mahusay na serbisyo, nasa atin ang kapangyarihang hubugin ang kinabukasan.

Sumainyo ang katotohanan.

Veritas Editorial

Picture of Rev. Fr. Anton CT Pascual

Rev. Fr. Anton CT Pascual

Special treatment?

 86,853 total reads

 86,853 total reads Mga Kapanalig, isa si dating House Speaker at Leyte Representative Martin Romualdez sa mga sinasabing pangunahing personalidad na sangkot sa flood control scandal

Read More »

Bayan bago banyaga

 172,263 total reads

 172,263 total reads Mga Kapanalig, nagsimula na ang 49th ASEAN Summit sa Pilipinas. Malinis na mga kalsada, maayos na paligid, at maaliwalas na tanawin ang sumalubong

Read More »

Magparehistro na para makaboto sa 2028!

 236,104 total reads

 236,104 total reads Mga Kapanalig, pwede nang magparehistro ang mga botante para sa 2028 national at local elections hanggang sa ika-30 ng Hulyo, 2027. Maaaring magparehistro

Read More »

FILIPINO’s RUNNING OUT OF PATIENCE

 317,611 total reads

 317,611 total reads Kapanalig, hindi makakausad ang bansa kung ang mga mamamayan nito ay hirap na hirap maka-survive, habang ang mga inaasahang lider na pinagkakatiwalaang mamuno

Read More »

SCRIPTED NONSENSE

 396,527 total reads

 396,527 total reads Kapanalig, ano ang napapansin niyo sa pagpapatuloy ng impeachment trial ni Vice President Sara Duterte? Sa simula pa lamang ng impeachment trial, pinapalutang

Read More »

Watch Live

RELATED TOPICS

Huwebes, Nobyembre 5, 2026

 29,976 total reads

 29,976 total reads Huwebes ng Ika-31 Linggo sa Karaniwang Panahon (II) Filipos 3, 3-8a Salmo 104, 2-3. 4-5. 6-7 Ang may pusong tapat sa D’yos ay

Read More »

Miyerkules, Nobyembre 4, 2026

 32,498 total reads

 32,498 total reads Paggunita kay San Carlos Borromeo, obispo Filipos 2, 12-18 Salmo 26, 1. 4. 13-14 Panginoo’y aking tanglaw, siya’y aking kaligtasan. Lucas 14, 25-33

Read More »

Martes, Nobyembre 3, 2026

 34,583 total reads

 34,583 total reads Martes ng Ika-31 Linggo sa Karaniwang Panahon (II) o kaya Paggunita kay San Martin de Porres, namanata sa Diyos Filipos 2, 5-11 Salmo

Read More »

Lunes, Nobyembre 2, 2026

 33,100 total reads

 33,100 total reads Paggunita sa Lahat ng mga Pumanaw na Kristiyano Mga Pagbasa para sa Unang Misa 2 Macabeo 12, 43-46 Salmo 103, 8 at 10.

Read More »

Linggo, Nobyembre 1, 2026

 34,201 total reads

 34,201 total reads Dakilang Kapistahan ng Lahat ng mga Banal Pahayag 7, 2-4. 9-14 Salmo 23, 1-2. 3-4ab. 5-6 Panginoon, ang bayan mo ay dumudulog sa

Read More »

SUPPORT OUR MISSION

BECOME A KAPANALIG MEMBER AND EUCHARISTIC ADVOCATE!

CATHOLINK

THE PHILIPPINES CATHOLIC CHURCH ONLINE DIRECTORIES

Scroll to Top