33,196 total reads
Puspusan ang isinasagawang paghahanda ng Parish Pastoral Council for Responsible Voting (PPCRV) para sa aktibong pakikilahok sa pagbabantay ng kauna-unahang Bangsamoro Autonomous Region in Muslim Mindanao (BARMM) Parliamentary Elections sa Setyembre 14, 2026.
Sa panayam sa Radyo Veritas, inihayag ni PPCRV Chairman Evelyn Singson na kabilang sa tungkulin ng PPCRV sa nakatakdang halalan ang pagtulong sa mga botante at pagsasagawa ng unofficial parallel count.
Ayon kay Singson, itinalaga ang kanilang mga volunteer na magsagawa ng Voters’ Assistance Desk upang gabayan ang mga botante bago sila pumasok sa mga polling precinct.
“We have been assigned to do Voters’ Assistance Desk. Meaning to say na lahat ng kailangan ng botante bago pumasok sa presinto, tutulungan namin sila.” Bahagi ng pahayag ni Singson sa Radyo Veritas.
Bukod sa voter assistance, magsasagawa rin ang PPCRV ng unofficial parallel count kung saan kokolektahin ang mga election returns mula sa mga polling center sa buong BARMM at ipapadala sa PPCRV Command Center sa Makati, na manu-manong i-scan ang bawat election returns at ihahambing sa transmitted results bilang bahagi ng integrity check.
“We have also been mandated to do an unofficial parallel count, so that ‘yung boto galing sa presinto, ire-transmit dito at bibilangin at ikukumpara kung ano ‘yung pinasok at kung ano ang lalabas.” Dagdag pa ni Singson.
Pagbabahagi ni Singson, malaking bilang ng volunteers ang ipinadala ng PPCRV sa BARMM dahil mahalagang maging matagumpay ang kauna-unahang parliamentary elections sa rehiyon matapos ang maraming taong paghihintay para maisakatuparan ito.
“Kaya ang PPCRV, marami kaming volunteers ngayon diyan, because as the first BARMM election, importante na maging successful ito dahil after so many years of trying to get this done, ngayon nangyayari na.” Ayon pa kay Singson.
Hinimok din ni Singson ang mga mamamayan ng BARMM na gamitin ang kanilang karapatang bumoto at pumili ng mga kandidatong tunay na maglilingkod sa kanilang komunidad.
“Maligaya tayo na sana lahat ng taga-BARMM, bumoto at pumili ng tamang kandidato. And hopefully, it is the beginning of peace and democracy in the BARMM region.” Ani Singson.
Binigyang-diin ni Singson na ang mga PPCRV volunteers ay naglilingkod nang walang hinihintay na kapalit, gamit ang kanilang oras at kakayahan para makatulong sa isang malinis at mapagkakatiwalaang halalan.
Ipinaalala rin ni Singson sa mga volunteers na tungkulin nilang tulungan ang mga botante at bantayan ang proseso mula sa pagboto hanggang sa pagtatapos ng halalan.
Ayon pa kay Singson, ang tunay na layunin ng pagbabantay sa halalan ay upang matiyak na ang resulta ay tunay na sumasalamin sa kagustuhan ng mga mamamayan.
“Lahat tayo, volunteers lang. Ang naibibigay natin: ang ating oras, ang ating talino… at sana magbunga ng kabutihan ang ating ini-invest dito para sa bayan. Lahat ng volunteers, dapat tayo ay magbantay nang mahusay, tumulong sa mga botante—’yan ang ating duty—at hanggang sa matapos ang eleksyon, tayo ay naroon para bantayan na ang boto na ipinasok sa balota ay ang botong bibilangin, at sa huli, ang mananalo ay boses ng taumbayan.” Paalala ni Singson.
Kasama rin ang PPCRV sa magsasagawa ng Random Manual Audit (RMA) na isang proseso na tumutulong sa pagsusuri sa accuracy ng mga voting machines.
Bilang bahagi ng paghahanda, inilunsad ng Parish Pastoral Council for Responsible Voting (PPCRV) ang PPCRV-AMA Command Center sa AMA School of Medicine Annex Building, kung saan isasagawa ng PPCRV ang Unofficial Parallel Count na magsisimula sa Setyembre 17 o 18 at magpapatuloy hanggang Setyembre 20, 2026.
