19,145 total views
Binigyang diin ni Tagbilaran Bishop Alberto Uy na walang maliit na pananagutan o responsibilidad ang dapat na ipagsawalang bahala ng mga opisyal ng bayan.
Ito ang binigyang diin ng Obispo kaugnay sa mga kalat at campaign materials na naiwan sa katatapos lamang na 2025 Midterm National and Local Elections.
Ayon sa Obispo, hindi karapat-dapat na ihalal ang mga opisyal na binabalewala ang kanilang pananagutan sa pagsasaayos at paglilinis sa komunidad mula sa mga kalat na dulot ng kanilang iba’t ibang campaign materials noong panahon ng halalan.
Paliwanag ni Bishop Uy, hindi maaaring asahan sa mas malalaking tungkulin sa pamahalaan ang mga opisyal na walang inisyatibo at sariling pananagutan maging sa maliliit na bagay.
“Leaders who fail to handle small responsibilities, such as the proper disposal of their campaign tarpaulins, cannot be expected to manage greater duties. They do not deserve our votes again.” Bahagi ng pahayag ni Bishop Uy.
Una na ngang binigyang diin ng Obispo na kaakibat ng patuloy na paninindigan ng Simbahan para sa pangangalaga sa kalikasan ang pagsusulong ng malinis at responsableng pamamahala sa bansa.
Kaugnay nito batay sa tala ng environment watchdog na Ecowaste Coalition, noong 2016 national elections umabot sa 206 na toneladang basura ang nakolekta, nasa 200 toneladang basura naman noong 2019 midterm elections habang noong 2022 national elections ay tumaas ito ng halos 20% na umabot sa 254 na toneladang basura.
Samantala sa pinakahuling tala ng Commission on Elections (COMELEC) sa Kalakhang Maynila batay sa ulat ng Metropolitan Manila Development Authority (MMDA), umaabot na sa mahigit 64.5 metriko tonelada ng basura ang nakolekta sa National Capital Region pa lamang mula noong araw ng halalan na kinabibilangan ng iba’t ibang campaign materials na ginamit sa pangangampanya ng mga kandidato sa nakalipas na eleksyon.
