18,758 total views
Nakatakdang pangunahan ni Caritas Philippines President, San Carlos Bishop Gerardo Alminaza ang pagdiriwang ng Mass for Peace bilang tugon sa Prayer Vigil for World Peace na panawagan ni Pope Leo XIV.
Isasagawa ang nakatakdang Mass for Peace ganap na alas-tres ng hapon sa Our Lady of the Remedies Parish o mas kilala na Malate Churh sa ika-11 ng Abril, 2026.
Susundan ang banal na misa ng outdoor bell-ringing at ecumenical prayers bilang pagpapakita ng pagkakaisa ng lahat para sa pananalangin para sa kapayapaan at pagwawakas ng anumang digmaan sa daigdig.
Katuwang ng humanitarian, development and advocacy arm ng Catholic Bishops’ Conference of the Philippines sa pagsasagawa nng nakatakdang Mass for Peace ang One Faith. One Nation. One Voice, Hayuma: Mending the Nets Initiative, at Conference of Major Religious Superiors.
Ang panawagan ng CBCP para sa pagsasagawa ng special prayer vigil para sa kapayapaan sa darating na Abril 11, 2026 ay bilang tugon sa nauna sa panawagan ni Pope Leo XIV sa kanyang nakalipas na Easter Urbi et Orbi message.
Samantala, una na ring itinakda ng Catholic Bishops’ Conference of the Philippines (CBCP) sa Abril 12, 2026 ang muling pagtatalaga sa Divine Mercy ng buong bansa bilang tugon sa kasalukuyang mga hamon at kawalang-katiyakan sa mundo.
