8,661 total reads
Pinaalalahanan ng grupong BAN Toxics ang publiko na maging mapanuri sa pagbili ng mga swimming floater toys para sa mga bata ngayong tag-init.
Ito ay kasunod ng isinagawang market monitoring kung saan nakitaan ng kakulangan sa tamang labeling ang ilang murang produkto na ibinebenta sa Metro Manila at Tacloban, na hindi tumutugon sa Republic Act 10620 o ang Toy and Game Safety Labeling Law.
Sa pagsusuri ng grupo, nadiskubre ang mataas na antas ng lead, mercury, at cadmium sa ilang sample—na lampas sa itinakdang pamantayan sa kaligtasan ng mga laruan.
Ayon kay Thony Dizon, Advocacy and Campaign Officer ng BAN Toxics, ang mga kemikal na ito ay maaaring magdulot ng seryosong panganib sa kalusugan ng mga bata, kabilang ang pinsala sa utak, pag-unlad, at iba pang bahagi ng katawan.
“Toys that are unsafe for children should be immediately removed from the market to prevent chemical exposure to children and the environment,” paalala ni Dizon.
Hinala rin na ang ilang produkto ay gawa sa polyvinyl chloride o PVC na maaaring naglalaman ng phthalates na may masamang epekto sa endocrine system.
Ipinatupad ng Pilipinas ang pamantayan sa kaligtasan ng mga laruan sa ilalim ng Philippine National Standard (PNS), na sumasaklaw sa pisikal at kemikal na katangian, flammability, presensya ng ilang mapanganib na sangkap, at gabay sa angkop na edad ng mga bata.
Sa kabila ng umiiral na mga regulasyon, iginiit ni Dizon na patuloy pa rin ang bentahan ng hindi rehistrado at hindi ligtas na produkto.
Dahil dito, nanawagan ang BAN Toxics sa Food and Drug Adminidtration (FDA) at Department of Trade and Industry (DTI) na higpitan ang pagpapatupad ng batas at tiyakin ang kaligtasan ng mga laruan sa merkado.
“We appeal to the FDA and DTI to conduct enforcement action against unsafe toys and childcare articles being sold in the market to protect the public, especially children, from toxic harm,” ayon kay Dizon.
Nakasaad sa katuruan ng Simbahang Katolika na bagamat pinahihintulutan ang pagkita sa negosyo, nararapat lamang na tiyakin na ang mga produktong inilalabas sa merkado ay ligtas at hindi nagdudulot ng panganib sa tao at sa kalikasan.
