159 total views
Nagbabala ang Alyansa Tigil Mina (ATM) laban sa isinusulong na open-pit gold and copper mining project ng Kingking Mining Corporation (KMC) sa Davao de Oro, dahil sa posibleng conflict of interest bunsod ng paglahok ng pamilyang Villar sa proyekto.
Ayon kay ATM National Coordinator Jaybee Garganera, maaaring maapektuhan ang pananagutan at pagsusuri sa posibleng epekto ng pagmimina dahil sa malawak na impluwensiyang pampulitika at pang-ekonomiya ng pamilyang Villar.
“The Villar’s 40 percent stake in the Kingking project and their deeply entrenched political power is a clear conflict of interest,” pahayag ni Garganera.
Sinabi ni Garganera na nakababahala ang posibilidad na hindi mabigyang-pansin ang anumang paglabag o negatibong epekto ng operasyon ng kumpanya dahil sa kapangyarihang hawak ng pamilya.
Binigyang-diin din ng grupo na ang paggamit ng open-pit mining method ay maaaring magdulot ng malawakang pinsala sa kapaligiran, kabilang ang pagkawala ng tirahan ng mga hayop, kontaminasyon ng tubig, at pagdami ng basurang pagmimina.
Iginiit ni Garganera, dapat manaig ang pangangalaga sa kalikasan at kapakanan ng mga komunidad kaysa sa interes sa kita.
Dagdag pa niya, maaaring magamit ang impluwensiyang pampulitika ng pamilya upang isulong ang mga patakarang pabor sa pagmimina na maaaring makaapekto sa kalikasan at karapatan ng mga mamamayan.
“We seriously doubt that the Villar family would prioritize environmental protection and community welfare over profits. Furthermore, the political positions of the Villar clan allow them to direct policies that would advance their mining interests at the expense of the environment and human rights,” ayon kay Garganera.
Ang pahayag ng ATM ay kasunod ng mga ulat na maglalaan ang KMC ng ₱307.8 billion para sa pagpapalawak ng Kingking project.
Nanawagan ang grupo sa publiko na manatiling mapagmatyag sa mga susunod na hakbang ng proyekto at suportahan ang mga komunidad na posibleng maapektuhan ng operasyon ng pagmimina.
Sang-ayon naman sa Laudato Si’ ni Pope Francis, mariin nitong tinututulan ang industriya ng pagmimina dahil nag-iiwan lamang ito ng labis na pinsala sa mga komunidad at nakadaragdag sa labis pang paghihirap ng mamamayan.
