2,269 total reads
Binigyang diin ng Ecowaste Coalition na hindi lamang dami ng nakolektang basura ang dapat tingnan matapos ang Undas, kundi kung may maayos at tuloy-tuloy na sistema ng solid waste management sa mga sementeryo at lokal na pamahalaan.
Sa panayam sa programang Veritas Pilipinas, sinabi ni Ms. Ochie Tolentino, Zero Waste Campaigner ng EcoWaste Coalition na nagsagawa ang kanilang grupo ng monitoring sa pitong lugar upang tingnan kung naipatutupad ang mga wastong gawain sa ilalim ng Republic Act No. 9003 o Ecological Solid Waste Management Act.
“Kasi ho maganda po kasing tingnan po… kung ‘yung pong batas… mula na ise-segregate siya, siya po ay ire-recycle, siya po ay ikokompost, ay ilalagay sa tamang lalagyan, sa material recovery facility kung meron po ang mga sementeryo. ‘Yun po kasi ‘yung mahalaga… na ‘yung may sistema.” Bahagi ng pahayag ni Tolentino sa Radyo Veritas.
Binigyang-diin niyang hindi dapat tuwing Undas lamang isinasagawa ang wastong waste management kundi buong taon.
“Kasi kung intact po ‘yung sistema, weather ito po ay Undas o hindi, ‘yung pong practice na ‘yun, ‘yung sistemang ‘yun ay gagawin po all throughout the year.” Dagdag pa ni Tolentino.
Ipinaliwanag din ni Tolentino na ang zero waste ay nangangailangan ng pagbabago sa lifestyle at tamang paghihiwalay ng basura mula sa pinagmumulan.
“Kaya sa zero waste po kasi, ito po ‘yung pamumuhay na walang pag-aaksaya.” Ayon pa kay Tolentino.
Mahalaga rin, ayon kay Tolentino, na ang segregation ay nagsisimula mismo sa pinagmumulan ng basura at hindi lamang sa oras na ito ay kinokolekta.
Aniya, kung sama-samang kinokolekta ang iba’t ibang uri ng basura at isinasakay sa iisang trak, hindi naipatutupad ang wastong sistema na itinatadhana ng RA 9003.
“Eh ang sabi po kasi ng batas, kailangan po mula sa source, kailangan hiwalay na po natin ‘yun. Eh ang nangyayari, kokolek, sama-sama po doon sa waste bins, tapos po isasakay po sa trak, which is violation po kasi ‘yun ng RA 9003.” Dagdag pa ni Tolentino.
Ayon kay Tolentino, ang mga nabubulok ay dapat ibalik sa lupa sa pamamagitan ng composting, habang ang mga recyclable gaya ng papel, bote at bakal ay dapat maibalik sa recycling system kung saan ang mga residual waste lamang ang dapat mapunta sa landfill.
“Ang tahanan po talaga ng mga nabubulok ay ang lupa. Ibalik po siya sa lupa.” Ani Tolentino.
Para kay Tolentino, ang pagbawas ng basura ay nagsisimula sa simpleng pagbabago ng nakasanayang pamumuhay at sa pagkakaroon ng sistemang ipinatutupad nang tuloy-tuloy sa mga komunidad.
Sa pananaw ng Simbahan, ang ganitong pangangalaga sa kapaligiran ay bahagi rin ng pananagutan ng tao bilang tagapangalaga ng sangnilikha kung saan kinakailangan ang wastong paggamit ng mga likas na yaman at pag-iwas sa pag-aaksaya bilang pagpapakita rin ng malasakit hindi lamang sa kalikasan kundi sa kapwa at sa mga susunod na salinlahi.
