2,112 total reads
Inihalal si Fr. Jan Michael Juria Gadicho, PhD, bilang bagong diocesan administrator ng Diocese of Borongan sa Eastern Samar.
Ayon sa diyosesis, pansamantalang pamumunuan ni Fr. Gadicho ang lokal na Simbahan habang wala pang naitatalagang bagong obispo.
“The Roman Catholic Diocese of Borongan officially announces the election of Rev. Gadicho, as Diocesan Administrator during this period of sede vacante,” ayon sa inilabas na pahayag ng diyosesis.
Bilang diocesan administrator, pamamahalaan ni Fr. Gadicho ang mga gawain ng diyosesis alinsunod sa mga batas ng Simbahan hanggang sa pagkakatalaga ng susunod na obispo.
Hinimok naman ng Diocese of Borongan ang mga mananampalataya na ipagdasal si Gadicho sa kanyang bagong tungkulin.
Matatandaang itinalaga ng Santo Papa Francisco si Bishop Crispin Varquez bilang obispo ng Tagbilaran, kahalili ni Archbishop Alberto Uy na pangangasiwaan naman ang Archdiocese ng Cebu.
Sa kasalukuyan ay may anim na sede vacante sa Simbahan sa Pilipinas o walang tagapangasiwang obispo, kabilang na ang mga diyosesis sa Borongan, Ilagan, Jolo, Kabankalan, Masbate at Parañaque.
