1,207 total reads
Binigyang-diin ni Pope Leo XIV na hindi dapat hayaang artificial intelligence o AI ang magpasya sa mga bagay na may epekto sa buhay, kalayaan at kaligtasan ng tao.
Sa kanyang mensahe sa “The Future of AI: A Dialogue Between the Vatican and the Scientific World on the Developments and Applications of Intelligent Technologies”, sinabi ng Santo Papa na dapat manatili sa tao ang kontrol sa paggamit ng teknolohiya upang mapangalagaan ang dignidad at karapatan ng bawat isa.
“Well aware of the challenges that arise wherever human dignity is threatened,” ayon kay Pope Leo.
Ipinaliwanag ni Pope Leo na ang AI ay kasangkapan lamang at hindi dapat ituring na kapalit ng tao dahil wala itong tunay na damdamin, karanasan at kakayahang umunawa sa pagmamahal at pananagutan.
“We have the responsibility to guide, change, and, when necessary, reject its applications,” ayon pa sa Santo Papa.
Nagbabala rin siya sa paggamit ng AI sa pagtukoy kung sino ang ituturing na banta o isasama sa listahan ng mga target. Sa ganitong sitwasyon, maaaring ituring na simpleng datos lamang ang isang tao.
Dahil dito, iginiit niyang dapat manatili sa tao ang pagpapasya sa mga usaping may kinalaman sa buhay at paggamit ng puwersa. Hinimok din niya ang mga bansa na kumilos upang ipagbawal ang mga sandatang kayang pumatay nang walang direktang kontrol ng tao.
Paliwanag pa ni Pope Leo, “Decisions affecting human life, freedom and the use of force must always remain subject to effective, informed, and responsible human oversight.”
Ayon sa Santo Papa, nakasalalay sa mga desisyon ng tao ang magiging direksiyon ng AI. Kaya hindi lamang dapat itanong kung ano ang kayang gawin ng teknolohiya, kundi kung paano ito makatutulong sa lahat.
Binigyang-diin niyang dapat gamitin ang AI para sa kapakanan ng nakararami at hindi lamang para sa interes ng iilang makapangyarihan.
Nanawagan din siya sa mga pamahalaan at institusyon na magpatupad ng malinaw na mga patakaran at bantayan ang paggamit ng AI upang maiwasan ang pang-aabuso at mapanagot ang mga responsable sa anumang pinsalang maidudulot nito.
Ang pagpupulong ay inorganisa ng Pontifical Academy for Life at Future of Life Institute upang talakayin ang mga hamon at responsibilidad sa patuloy na pag-unlad ng artificial intelligence.
