917 total reads
Iginiit ni Pope Leo XIV na nakatutulong ang pananampalatayang Kristiyano sa pagpapayaman ng kultura at paghubog ng tao, lalo na sa pamamagitan ng pagmamahal, paglilingkod at paghahanap ng katotohanan.
Sa kanyang general audience sa St. Peter’s Square sa Vatican noong Miyerkules, ipinaliwanag ng Santo Papa ang ugnayan ng pananampalataya at kultura batay sa dokumentong Gaudium et Spes ng Second Vatican Council.
Ayon sa Santo Papa, matagal nang nagtataguyod ang Simbahan ng mga paaralan at pamantasan upang mapaunlad ang kaalaman, pagkatao at espirituwalidad ng mga tao.
Binigyang-diin din pinunong pastol na makatutulong ang iba’t ibang kultura sa paghahanda ng mga tao na tanggapin ang Mabuting Balita, dahil bawat kultura ay may sariling paraan ng paghahanap ng kahulugan ng buhay.
“The relationship between faith and culture finds its primary foundation in the Incarnation. As the divine Word became flesh and came to dwell in our midst, so too is faith an incarnate reality, interwoven with the culture in which it is immersed,” ayon kay Pope Leo.
Ipinaliwanag ni Pope Leo na hindi dapat magkahiwalay ang pananampalataya at pag-aaral, kundi ay magkaugnay ang kaalaman sa agham at iba pang larangan at ang mas malalim na pag-unawa sa pananampalataya.
“Faith dwells within them, shaping them from within according to the ‘form’ of Jesus Christ; that is, through charity, service and the filial recognition of God’s fatherhood,” ayon pa sa mensahe ng Santo Papa.
Hinimok din ng Santo Papa ang Simbahan na pahalagahan ang mabuti, maganda at totoo sa bawat kultura upang mas maipahayag ang mensahe ni Hesukristo.
Ayon sa Santo Papa, dapat makita sa buhay ng mga Kristiyano ang pananampalatayang nakaugat kay Kristo, sa pamamagitan ng pagmamahal sa kapwa, paglilingkod at pagkilala sa Diyos bilang Ama.
Samantala, kabilang sa mga dumalo sa pagtitipon ang humigit-kumulang 50 mananampalataya mula sa St. Jude Catholic Church sa New Lenox, Illinois, Estados Unidos. Kabilang sa grupo ang kapatid ng Santo Papa na si John Joseph Prevost.
Nagtapos ang kanilang paglalakbay sa Vatican matapos bisitahin ang ilang makasaysayang bayan sa Italy na may kaugnayan sa buhay at pamana ni San Agustin.
