2,003 total reads
Hinimok ni Antipolo Bishop Ruperto Santos ang mga mananampalataya na ipagpatuloy ang pagmamahal, paglilingkod at mabubuting aral na iniwan ng kanilang mga yumaong mahal sa buhay bilang paraan ng pagbibigay-pugay sa kanila.
Sa kanyang pagninilay, inilarawan ni Bishop Santos ang buhay bilang isang paglalakbay na may hangganan, kung saan ang bawat tao ay nagmula sa Diyos at nakatakdang magbalik sa Kanya.
Binigyang-diin niya na hindi maiiwasan ang kamatayan kaya mahalagang maging handa sa pamamagitan ng palagiang pananalangin at pagsunod sa kalooban ng Diyos.
“Mga kapatid, higit silang mamayapa sa piling ng Diyos kung ang kanilang mga pangaral ay muli nating sasabihin at sasambitin, at ang kanilang mga gawain at halimbawa ay muli nating bubuhayin at isasabuhay. Sila ay higit na mamamahinga sa piling ng Diyos kapag nakikita nila na ang kanilang itinanim na salita ng Diyos, ang halimbawa ni Kristo at pagtulad kay Hesukristo ay ating ginagawa. Tayo rin ay naglilingkod sa Simbahan at tumutulong sa ating parokya,” pagninilay ni Bishop Santos
Ipinaliwanag din ng Obispo ang kahulugan ng mga katagang ‘Sumalangit Nawa’ at ‘Rest in Peace’, na hindi lamang nagpapahayag ng pag-asang makamit ng mga yumao ang buhay na walang hanggan, kundi nagpapaalala rin sa mga naiwan na panatilihin ang pagkakaisa ng pamilya, pangalagaan ang mga pinaghirapan ng kanilang mga mahal sa buhay at isabuhay ang mga mabubuting halimbawang iniwan nila.
Binigyang-pugay rin ni Bishop Santos ang mga yumaong pari na nag-alay ng kanilang buhay sa pananalangin at paglilingkod sa Simbahan at sa mga mananampalataya dahil higit na magiging makabuluhan ang kanilang pamamahinga kung patuloy na isasabuhay ng mga naiwan ang kanilang mga pangaral at halimbawa.
