849 total reads
Hinihikayat ni Rev. Fr. Anton CT Pascual, Executive Director ng Caritas Manila at dating pangulo ng Radyo Veritas, ang mga mananampalataya na makiisa sa kampanyang “Dapat Isa Lang” na naglalayong isulong ang isang batas laban sa political dynasty sa bansa.
Sa kanyang mensahe matapos ang Banal na Misa para sa mga Yumao sa Holy Trinity Chapel ng Loyola Memorial Park sa Marikina City, sinabi ni Fr. Pascual na nakikiisa ang Simbahan sa adbokasiya ng ilang non-government organizations at cause-oriented groups na naglalayong baguhin ang sistema ng pulitika sa bansa.
Ayon sa Pari, layunin ng “Dapat Isa Lang” na magkaroon ng panukalang Anti-Political Dynasty Law na maglilimita sa sabay-sabay na pag-upo sa puwesto ng magkakamag-anak sa pambansa at lokal na pamahalaan.
“Ito po ay ating paraan upang baguhin ang pulitika ng ating pamahalaan para maalis ang political dynasty.” Bahagi ng pahayag ni Fr. Pascual sa Radyo Veritas.
Ipinanukala rin ni Fr. Pascual ang paggamit ng People’s Initiative upang direktang maisulong sa mga botante ang isang panukalang batas laban sa political dynasty.
Pagbabahagi ng Pari, nakasaad sa Konstitusyon ang mekanismo kung saan maaaring makilahok ang mamamayan sa paggawa o pag-amyenda ng batas.
Sa kanyang mensahe, ipinaliwanag din rin Fr. Pascual na isinusulong ng “Dapat Isa Lang” ang limitasyon na iisa lamang na miyembro ng isang pamilya ang maaaring humawak ng posisyon sa pambansa at lokal na antas, kabilang ang mga kamag-anak hanggang fourth degree of consanguinity na naayon din sa panukala.
Naniniwala rin si Fr. Pascual na makatutulong ang naturang panukala upang magkaroon ng mas maraming pagkakataon ang ibang mamamayan na makilahok sa pamahalaan at mapalakas ang tiwala sa demokrasya.
“Kaya pag-isipan niyo po ng seryoso kayong mga botante, kayong mga nakikinig, kung gusto nating baguhin ang ating bansa, gamitin po natin ang halalan. At ngayon gumawa ng batas, tunay na batas, para kontrolin natin ang family dynasty.” Dagdag pa ni Fr. Pascual.
Hinimok din ng Pari ang mga mamamayan na alamin ang kampanyang “Dapat Isa Lang” online at makibahagi sa isinusulong nitong signature campaign para sa People’s Initiative.
“Magbago na tayong mga Katoliko, tayong mga Pilipino.” Panawagan ni Fr. Pascual.
Bago ang kanyang mensahe tungkol sa political reform, nagpasalamat din si Fr. Pascual sa Loyola Memorial Park at sa paggamit ng Holy Trinity Chapel, gayundin sa patuloy na presensya ng Radyo Veritas 846 sa taunang paggunita sa mga yumao.
Hinikayat niya ang mga Katoliko na patuloy na makinig sa Radio Veritas bilang daluyan ng mga balita at katuruan ng Simbahan, lalo na sa panahong tinawag niyang “post-truth,” kung kailan nagkakaiba-iba ang pinaniniwalaan ng mga tao.
Paalala ni Fr. Pascual, “Mahalaga na tayo po ay tapat sa katotohanan na naggaling sa Diyos. Palaging nakikinig ng Veritas 846.”
Muli ring binigyang diin ng Pari ang kalakip na plenary indulgence ng tradisyonal ng pagdalaw sa mga sementeryo at pananalangin para sa mga yumao sa unang walong araw ng Nobyembre.
Sa pagtatapos, iniugnay ni Fr. Pascual ang pananampalataya sa responsibilidad ng mga Kristiyano sa lipunan, at hinimok ang mga mananampalataya na mahalin ang Diyos at ang bayan sa pamamagitan ng kanilang pakikilahok sa buhay ng bansa.
“O kaya magising na po tayo, mga Pilipino, mahalin natin ang Diyos, mahalin natin ang ating bansa.” Ayon pa kay Fr. Pascual.
Nagtapos ang kanyang mensahe sa paanyaya sa mga mananampalataya na mamuhay nang may kabanalan bilang bunga ng kanilang pananampalataya at pakikilahok sa lipunan.
