15,516 total views
Nanawagan ng mas malalim na pagninilay at makataong pagsasagawa ng mga tradisyong panrelihiyon si Fr. Angel Cortez, OFM, co-execuitive secretary ng Conference of Major Religious Superiors in the Philippines (CMSP), kaugnay sa naging kontrobersyal na insidente sa Salubong sa isang parokya sa Concepcion, Malabon.
Sa kanyang pahayag, binigyang-diin ni Fr. Cortez na bagama’t mahalaga ang kabanalan ng mga liturhikal na pagdiriwang, kinakailangang ito ay laging kaayon ng malasakit, pag-aaruga, at paggalang sa lahat ng nilikha ng Diyos.
Ayon sa pari, ang mga simbolo sa pananampalataya—gaanuman kahalaga—ay hindi dapat maging sanhi ng paglabag sa dignidad at kapakanan ng alinmang nilalang.
“Sa diwang Franciscano, tinatawag tayong kilalanin ang lahat ng nilikha bilang ating mga kapatid, na ipinagkatiwala sa ating pangangalaga,” pahayag ng pari sa panayam ng Radyo Veritas.
Iginiit din nito na ang nangyaring insidente ay hindi dapat maging sanhi ng pagtatalo kundi magsilbing paanyaya sa bukas na diyalogo sa loob ng Simbahan.
Dagdag pa ni Fr. Cortez, mahalaga ang pakikinig at sama-samang pagninilay upang matiyak na ang mga gawain ng Simbahan ay tunay na sumasalamin sa Ebanghelyo ng awa, paggalang, at buhay.
Naniniwala ang pari na sa pamamagitan ng mas maingat at mapagkalingang pagpapahayag ng mga simbolo, mapananatili ang yaman ng tradisyon kasabay ng pananagutan sa pangangalaga sa kalikasan.
“Nawa’y magbunga ito hindi ng pagkakahati, kundi ng mas malalim na katapatan sa Diyos na naroroon sa lahat ng Kanyang nilikha,” ayon kay Fr. Cortez.
Humingi na ng paumanhin ang Diocesan Shrine and Parish of the Immaculate Conception, Malabon matapos ang insidente ng kalapating ikinabit sa mga lobo sa Salubong, kung saan inamin ng rektor at kura paroko ng dambana, Fr. Mariano “Jun” Bartolome, ang pagkukulang at humingi ng tawad sa mga mananampalataya at kay Pablo Virgilio Cardinal David.
Bagama’t matagal nang tradisyon ang paggamit ng buhay na kalapati, kinilala ng parokya ang pagkakamali sa nangyari—na binatikos din ni Cardinal David bilang kalupitan sa hayop—at iginiit na dapat isagawa ang mga tradisyong panrelihiyon nang may paggalang sa lahat ng nilikha.
