1,091 total reads
Naniniwala si dating Integrated Bar of the Philippines President Atty. Domingo Cayosa na mapapabilis ang paglilitis sa impeachment case ni Vice President Sara Duterte matapos bawiin ng House Prosecution ang tatlo sa apat na impeachment charges laban sa bise presidente.
Sa panayam sa programang Barangay Simbayanan, sinabi ni Cayosa na sa pagtutok na lamang ng prosecution sa Article II na may kaugnayan sa Unexplained Wealth, mas magiging limitado ang mga usaping kailangang pagtuunan ng pansin at imbestigahan ng Senate Impeachment Court.
“Ang una at pinakapraktikal na epekto nung pag-drop nung tatlong ibang charges at isa na lang ang ipa-pursue ng prosecution, eh mapapadali talaga ‘yung paglilitis. Sapagkat ma-focus na ang attention dito sa undeclared wealth ng Vice President.” Bahagi ng mensahe ni Cayosa sa Radyo Veritas.
Ayon sa dating IBP president, mahalaga ring matapos ang impeachment proceedings upang makabalik ang Senado sa iba pa nitong legislative responsibilities.
“So, kinakailangan din ng Senado ang oras para gawin ‘yung legislative work nila. So, at maganda rin na magkaroon ng stability, convicted or acquitted, eh tapos na ‘yung paglilitis.” Dagdag pa ni Cayosa.
Noong Oktubre 13, 2026 pinayagan ng Senate Impeachment Court ang withdrawal ng Articles I, III at IV, na tumatalakay sa confidential funds, bribery at grave threats, habang nananatili ang Article II hinggil sa alleged unexplained wealth.
“Karapatan ng prosecution” ang pagbawi sa charges
Para kay Cayosa na ring bilang isang legal analyst, walang paglabag sa rules sa ginawa ng prosecution dahil pinahihintulutan ng mga panuntunan ng impeachment proceedings ang pagbawi sa ilang charges.
“Wala ho nalalabag na batas sa pag-drop na kaso. Kasi, di ba sinasabi noon, bago pa na pwede na lang i-drop ang anumang charge, so wala ho silang nalabag, kasi nga karapatan nila ‘yun eh. That’s covered by the rules.” Ayon pa kay Cayosa.
Kasabay nito, tinutulan din ni Cayosa ang argumento ng defense na hindi ito nabigyan ng sapat na pagkakataong maiharap ang kanilang depensa.
Aniya, ilang pagkakataon na rin ang ibinigay sa defense upang magsumite ng ebidensya at ilatag ang kanilang posisyon bago at habang nagpapatuloy ang impeachment proceedings.
“So, pagganon ho saan? Pumayag sila noon, eh ‘di wala sana silang problema, kasi every charge nagkakaroon sila ng pagkakataon.” Ani Cayosa.
Pagtuon sa natitirang kaso
Sinabi rin ni Cayosa na makatutulong ang pagtutok ng impeachment court sa natitirang Article II upang maging mas direkta at mabilis ang paglilitis.
Batay sa prosecution, ang Article II ay nakatuon sa mga alegasyon hinggil sa unexplained wealth, SALN declarations at prohibited business interests, kung saan naniniwala ang prosecution na sapat na ang mga ebidensyang naiharap nito para ipagpatuloy ang kaso sa naturang article.
Para naman kay Cayosa, ang iba pang alegasyon na inalis sa impeachment proceedings ay maaari nang harapin sa ibang legal na proseso kung may kaukulang kaso o aksyon sa mga ito.
“Tama rin naman na iwan mo na sa criminal court para mag-focus na lang doon sa simplihan na lang ‘yung natitira sa Senate Impeachment Court para maagaan ang trabaho ng depensa, maagaan ang trabaho ng mga senador, mag-focus na lang sila doon.” Pagbabahagi ni Cayosa.
Sa huli, sinabi ni Cayosa na mas makabubuti sa impeachment proceedings na matapos ang paglilitis at magkaroon ng pinal na desisyon batay sa ebidensya at sa batas.
“So, I think it will be good for everyone, including the prosecution, defense at ang taongbayan para magkaalaman na.” Dagdag pa ni Cayosa.
