9,865 total reads
Ikatlong Linggo sa Panahon ng Pagdating ng Panginoon (B)
Isaias 61, 1-2a. 10-11
Lucas 1, 46-48. 49-50. 53-54
Sa Poong D’yos malulugod
ang hinirang niyang lungsod.
1 Tesalonica 5, 16-24
Juan 1, 6-8. 19-28
Third Sunday of Advent (Rose or Violet)
Gaudete Sunday
UNANG PAGBASA
Isaias 61, 1-2a. 10-11
Pagbasa mula sa aklat ni propeta Isaias
Pinuspos ako ng Panginoon
ng kanyang Espiritu.
Hinirang niya ako
upang ang magandang balita’y
dalhin sa mahihirap,
pagalingin ang sugat ng puso,
palayain ang mga bihag at bilanggo.
Sinugo niya ako,
upang ibalitang ngayo’y panahon nang
iligtas ng Panginoon yaong mga tao na hinirang niya.
At ang Jerusalem
sa ginawang ito’y pawang malulugod,
anaki’y dalagang gayak ay pangkasal,
siya’y parang dinamtan
ng kaligtasan at pagtatagumpay.
Kung paanong ang binhi
ay tiyak na tutubo at sisibol,
gayun ang pagliligtas ng Panginoon
sa bayang kanyang hinirang.
Dahil dito, lahat ng bansa
ay magpupuri sa kanya.
Ang Salita ng Diyos.
SALMONG TUGUNAN
Lucas 1, 46-48. 49-50. 53-54
Sa Poong D’yos malulugod
ang hinirang niyang lungsod.
Ang puso ko’y nagpupuri sa Panginoon,
at nagagalak ang aking espiritu
dahil sa Diyos na aking Tagapagligtas.
Sapagkat nilingap niya ang kanyang abang alipin!
At mula ngayon, ako’y tatawaging mapalad ng lahat ng salinlahi.
Sa Poong D’yos malulugod
ang hinirang niyang lungsod.
Dahil sa mga dakilang bagay
na ginawa sa akin ng Makapangyarihan –
Banal ang kanyang pangalan!
Kinahahabagan niya ang mga may takot sa kanya,
sa lahat ng sali’t saling lahi.
Sa Poong D’yos malulugod
ang hinirang niyang lungsod.
Binusog niya ng mabubuting bagay ang mga nagugutom,
at pinalayas niyang wala ni anuman ang mayayaman.
Tinulungan niya ang kanyang bayang Israel,
bilang pagtupad sa pangako niya sa ating mga magulang.
Sa Poong D’yos malulugod
ang hinirang niyang lungsod.
IKALAWANG PAGBASA
1 Tesalonica 5, 16-24
Pagbasa mula sa unang sulat ni Apostol San Pablo sa mga taga-Tesalonica
Mga kapatid:
Magalak kayong lagi; maging matiyaga sa pananalangin. Ipagpasalamat ninyo sa pangalan ni Kristo Hesus ang lahat ng pangyayari, sapagkat yaon ang ibig ng Diyos.
Huwag ninyong hadlangan ang Espiritu Santo. Huwag ninyong hamakin ang anumang pahayag mula sa Diyos. Suriin ninyo ang lahat ng bagay at pulutin ang mabuti. Lumayo kayo sa lahat ng uri ng kasamaan. Nawa’y lubusan kayong pabanalin ng Diyos na siyang nagbibigay ng kapayapaan. At nawa’y panatilihin niyang walang kapintasan ang buo ninyong katauhan – ang espiritu, kaluluwa, at katawan – hanggang sa pagparito ng ating Panginoong Hesukristo. Tapat ang tumawag sa inyo, at gagawin niya ang mga bagay na ito.
Ang Salita ng Diyos.
ALELUYA
Isaias 61, 1
Aleluya! Aleluya!
Espiritu ng Maykapal
nasa akin upang hat’dan
ang mga dukha ng aral.
Aleluya! Aleluya!
MABUTING BALITA
Juan 1, 6-8. 19-28
Ang Mabuting Balita ng Panginoon ayon kay San Juan
Sinugo ng Diyos ang isang tao na nagngangalang Juan. Naparito siya upang magpatotoo tungkol sa ilaw at manalig sa ilaw ang lahat dahil sa patotoo niya. Hindi siya ang ilaw kundi naparito siya upang magpatotoo tungkol sa ilaw.
Nang suguin ng mga Judio sa Jerusalem ang ilang saserdote at Levita upang itanong kung sino siya, sinabi ni Juan ang katotohanan. Sinabi niyang hindi siya ang Mesias. “Kung gayo’y sino ka?” tanong nila. “Ikaw ba si Elias?” “Hindi po,” tugon niya. “Ikaw ba ang Propetang hinihintay namin?” Sumagot siya, “Hindi po.” “Sino ka kung gayun?” tanong nila uli. “Sabihin mo sa amin para masabi namin sa mga nagsugo sa amin. Ano ang masasabi mo tungkol sa iyong sarili?” Sumagot si Juan, “Ako
‘Ang tinig ng isang sumisigaw sa ilang:
Tuwirin ninyo ang daraanan ng Panginoon!’”
Ang Propeta Isaias ang maysabi nito.
Ang mga nagtanong ay sugo ng mga Pariseo. Muli nilang tinanong si Juan, “Bakit ka nagbibinyag, hindi pala naman ikaw ang Mesiyas, ni si Elias, ni ang Propeta?” Sumagot siya, “Ako’y nagbibinyag sa tubig, ngunit nasa gitna ninyo ang isang hindi ninyo nakikilala. Siya ang susunod sa akin, subalit hindi ako karapat-dapat magkalag man lamang ng tali ng kanyang panyapak.” Ito’y nangyari sa Betania, sa ibayo ng Jordan na pinagbibinyagan ni Juan.
Ang Mabuting Balita ng Panginoon.
PANALANGIN NG BAYAN
Ika-3 Linggo ng Adbiyento
Si Juan Bautista ay natatangi nating bayani at huwaran ngayon. Ipagdasal nating matulad tayo sa kanyang kababaang-loob at katapatan sa pagtupad sa pananagutan. Manalangin tayo:
Diyos ng katarungan, dinggin mo kami!
Nawa’y ang Simbahan ay manatiling tapat sa kanyang misyong magpahayag ng Mabuting Balita sa lahat ng bansa sa salita at sa gawa. Manalangin tayo!
Nawa’y patuloy tayong gabayan ng Santo Papa at ating mga obispo nang may karunungan at lakas ng loob sa Adbiyentong ito at sa buong buhay natin. Manalangin tayo!
Nawa’y patnubayan ng lahat ng tagapangaral, katekista, at mga guro ng relihiyon ang mga puso ng kanilang mga tinuturuan patungo kay Hesus at hindi sa kanilang sarili. Manalangin tayo!
Nawa’y ang lahat ng di pa tumatanggap kay Hesus ay matutong sumampalataya sa kanya bilang ilaw ng kanilang buhay. Manalangin tayo!
Nawa’y ang mga kabataan ay tuwinang maging masasayang tagapaghatid ng pag-ibig at awa ng Diyos para sa lahat. Manalangin tayo!
Nawa’y ang buhay nating lahat ay maging patuloy na saksi sa liwanag ni Hesus at ng kanyang Ebanghelyo. Manalangin tayo!
Para sa mga taong may malubhang kapansanan: maging sentro nawa sila ng atensyon at kalinga ng lipunan. Manalangin tayo!
Diyos ng liwanag, tulutan Mong ang aming asal at pag-uugali ay maging angkop sa Ebanghelyo ng buhay, upang maging saksi kami kay Hesus, ang ilaw ng daigdig na nabubuhay at naghahari magpakailanman. Amen!
