91,944 total views
Kapanalig, ang kredibilidad ng anumang anti-corruption crusade ng administrasyon ni Pangulong Ferdinand Marcos Jr., tulad ng binuong INDEPENDENT COMMISSION for INFRASTRUCTURE(ICI) ay nakasalalay kung hanggang saan ipagkatiwala sa taumbayan at media ang mga impormasyon na tutulong upang ma-expose ang mga nagaganap na katiwalian sa alinmang ahensiya at sangay ng pamahalaan.
Para sa tunay at makatotohanang krusada upang matigil na ang laganap na korapsyon, nararapat bigyan ng gobyerno ng kagya’t at permanenting online access ang publiko at media sa Statement of Contributions and Expenditures (SOCE) ng lahat lokal at nasyunal na kandidato. Mahalaga din na isapubliko ang Statement of Assets Liabilities Network (SALN) ng lahat ng public officials.
Hindi rin dapat itinatago ng administrasyong Marcos ang lahat ng infrastructure appraisal, approval at budget documents. Ilahad sa publiko at media ang lahat ng gagawing Congressional insertions, pagbabago at re-alignments sa pondo ng mga government projects. Kung walang itinatago ang administrasyon, dapat ding malaman ng publiko at media ang lahat ng project bid evaluations at mga resolusyon. Ibalandra din dapat ang lahat ng joint venture agreements at Public-Private Partnership contracts… Ilatag din ng administrasyon ang lahat ng project inspection at assessment reports., gayundin din ang lahat ng Commission on Audit (COA) reports. Kapag nagawa ito ng administrasyong Marcos, magkakaroon ng tiwala ang mamamayang Pilipino na seryoso at determinado ang kasalukuyang pamahalaan na walisin o di kaya’y unti-unting mapigilan ang tila nagiging kultura na katiwalian sa ating bayan.
Kapanalig, sa pamamagitan ng pagtataguyod ng makatotohanang, tuloy-tuloy, kumpleto at makatotohang impormasyon ay mabibigyan ng kapangyarihan ang mamamayang Pilipino at media na isiwalat ang anumang kamalian sa gobyerno, mabasag ang namumuong “culture of impunity” at ganap na maitatag ang “culture of accountability” na matagal nang nawawala sa bansa.
Kapanalig, nararapat makinig at bigyang halaga ng administrasyong Marcos ang pinaka-huling survey ng Pulse Asia na 51-porsiyento ng mga Pilipino ang tiwala sa media at civil society organizations (CSO’s) na mapigilan at maresolba ang suliranin ng korapsyon sa flood control projects ng gobyerno.
Lumabas din sa survey ang kawalan ng tiwala ng taumbayan na mareresolba ng ICI ang multi-bilyong pisong corruption. Bukod dito, atubili din ang taumbayan na matutugunan ng pangulong Marcos Jr., ng anumang ahensiya ng pamahalaan, maging ng Kongreso ang malawakan at tila naging lanrtaran na katiwalian sa pamahalaan.
Kapanalig, huwag tayong maging bystander lamang sa nakakagalit na sistematikong korapsyon., tumulong tayo sa pagpuksa ng masamang gawain na lalung nagpapahirap sa mayorya ng mga maghihirap na Pilipino.
Huwag na tayong magpapaloko sa mga politiko, sa mga opisyal ng pamahalaan dahil hindi na tayo makakaahon sa pagiging alipin.
Ika nga ng PETER 2:19 “They promise them freedom, but they themselves are slaves of corruption. For whatever overcomes a person, to that he is enslaved.”
Sumainyo ang Katotohanan.
