73 total reads
Kapistahan ni San Pedro Calungsod, Martir
Sirak 51, 1-12 (gr. 1-8)
Salmo 123, 2-3. 4-5. 7b-8
Tayo’y ibong nakatakas
nang ang bitag ay mawasak.
2 Corinto 6, 4-10
Juan 12, 24-26
Memorial of St. Pedro Calungsod, Martyr (Red)
Mga Piling Pagbasa mula sa Pangkat ng mga Martir
UNANG PAGBASA
Sirak 51, 1-12 (gr. 1-8)
Pagbasa mula sa aklat ni Sirak
Pinasasalamatan kita, Panginoon ko at Hari;
pinupuri kita, aking Diyos at Tagapagligtas.
Pinupuri kita sapagkat ipinagtanggol mo ako at inalalayan,
iniligtas sa kamatayan sa bitag ng dilang makamandag
at sa mga labing lumilikha ng kasinungalingan;
tinulungan mo ako laban sa aking mga kaaway.
Sinaklolohan mo ako alang-alang sa iyong habag at banal na pangalan,
at iniligtas sa mga ngipin ng mga nag-aabang upang ako’y lamunin,
sa mga kamay ng mga naghahangad kumitil ng aking buhay
at sa maraming kagipitang aking kinasuungan.
Iniligtas mo ako sa apoy na nasa aking paligid,
sa gitna ng apoy na hindi naman ako ang nagpaningas.
Hinango mo ako sa kalaliman ng bangin ng kamatayan,
iniligtas mo ako sa dilang marumi at sinungaling,
na nagpaparatang sa akin sa harapan ng hari.
Ang buhay ko’y nabingit sa kamatayan,
ang kaluluwa ko’y nasa labi na ng Sheol.
Naliligid ako ng mga kaaway
at wala isa mang tumulong sa akin;
naghanap ako ng sasaklolo, ngunit ako’y nabigo!
At naalaala ko, Panginoon, ang iyong pagkahabag,
at ang iyong mga gawa mula pa sa pasimula;
tinutulungan mo ang mga matiyagang umaasa sa iyo
at inililigtas mo sila sa mga kuko ng kaaway.
Ang Salita ng Diyos.
SALMONG TUGUNAN
Salmo 123, 2-3. 4-5. 7b-8
Tayo’y ibong nakatakas
nang ang bitag ay mawasak.
Kung ang Panginoong Diyos, sa amin ay di pumanig,
noong kami’y salakayin ng kaaway na malupit,
maaaring kami noon ay nilulon na nang buhay,
sa silakbo ng damdamin at matinding kagalitan.
Tayo’y ibong nakatakas
nang ang bitag ay mawasak.
Maaaring kami noo’y natangay na niyong agos,
naanod sa karagata’t tuluy-tuloy na nalunod;
sa lakas ng agos noo’y nalunod nga kaming lubos.
Tayo’y ibong nakatakas
nang ang bitag ay mawasak.
Nang ang bitag ay mawasak lubos tayong nakalaya.
Tulong nating kailangan ay sa Poon nagmumula,
pagkat itong lupa’t langit tanging siya ang lumikha.
Tayo’y ibong nakatakas
nang ang bitag ay mawasak.
Maaaring laktawan ang kasunod na pagbasa.
IKALAWANG PAGBASA
2 Corinto 6, 4-10
Pagbasa mula sa ikalawang sulat ni Apostol San Pablo sa mga taga-Corinto
Mga kapatid, ipinakikilala ko sa lahat ng paraan na ako’y lingkod ng Diyos: sa pagtitiis ng kahirapan, kapighatian, at mga kagipitan. Ako’y hinagupit, ibinilanggo at binugbog. Naranasan ko ang magtrabaho nang labis, ang di matulog magdamag, ang di kumain ng ilang araw. Ipinakilala kong ako’y lingkod ng Diyos sa pamamagitan ng malinis na pamumuhay, kaalaman, pagpapahinuhod, kabutihang-loob, ganoon din sa pamamagitan ng Espiritu Santo, tapat na pag-ibig, tapat na pananalita at kapangyarihan ng Diyos. Ang katuwiran ang siya kong sandatang panlaban at pananggalang. Naranasan kong parangalan at siraang-puri, laitin at papurihan. Ako’y itinuring na sinungaling, gayong katotohanan ang aking sinasabi. Ako’y itinuring na di kilala kahit kilalang-kilala; halos mamamatay na, ngunit malakas na malakas. Kahit ako’y pinarurusahan, hindi ako namamatay; inaring hapis na hapis, gayunma’y laging nagagalak; mukhang mahirap, ngunit nagpapayaman sa marami; waring walang-wala, ngunit akin ang lahat ng bagay.
Ang Salita ng Diyos.
ALELUYA
Mateo 5, 10
Aleluya! Aleluya!
Mapalad ang nagtitiis
sa mabuti’y inuusig
tagapagmana ng langit.
Aleluya! Aleluya!
MABUTING BALITA
Juan 12, 24-26
Ang Mabuting Balita ng Panginoon ayon kay San Juan
Noong panahong iyon, sinabi ni Hesus sa kanyang mga alagad: “Tandaan ninyo: malibang mahulog sa lupa ang butil ng trigo at mamatay, mananatili itong nag-iisa. Ngunit kung mamatay, ito’y mamumunga nang marami. Ang taong labis na nagpapahalaga sa kanyang buhay ay siyang mawawalan nito, ngunit ang napopoot sa kanyang buhay sa daigdig na ito ay siyang magkakaroon nito hanggang sa buhay na walang hanggan. Dapat sumunod sa akin ang naglilingkod sa akin, at saanman ako naroroon ay naroon din ang aking lingkod. Pararangalan ng Ama ang sinumang naglilingkod sa akin.”
Ang Mabuting Balita ng Panginoon.
PANALANGIN NG BAYAN
Ika-21 ng Oktubre
San Pedro Calungsod
Mga kaibigan, si San Pedro Calungsod, ang batang misyonero at katekistang layko, ay ang ating ikalawang santong Pilipino. Ang kanyang tapang ay isang birtud na tinatawag tayong tularan sa panahon ngayon. Ialay natin sa Diyos ang ating mga kahilingan sa pamamagitan ng pamamagitan ni San Pedro Calungsod.
Panginoon, dinggin Mo kami.
Na ang Simbahan, sa kanyang pagkakawanggawa sa Diyos at sa sangkatauhan, ay patuloy na magbunga ng katuwiran at magpalaya sa mga tao mula sa kasalanan at pang-aapi, upang matagpuan nila ang kagalakan sa buhay na puspos ng papuri sa Diyos. Manalangin tayo sa Panginoon.
Na ang mga katekistang Pilipino, na kumikilala rin kay San Pedro Calungsod bilang kanilang pintakasi, ay maging masigla sa kanilang paglilingkod sa pagtuturo ng pananampalataya sa sambayanan ng Diyos. Manalangin tayo sa Panginoon.
Na hindi kami kumapit sa mga munting bagay at panandaliang buhay na parang mga butil ng trigo, kundi maging handang mahulog sa lupa at mamatay upang magbunga nang sagana at makamit ang buhay na walang hanggan. Manalangin tayo sa Panginoon.
Na ang mga maysakit, mahihirap, at mga nagdadalamhati ay makatagpo sa mga tagasunod ni Hesus ng mga puspos ng kagalakan sa pagbibigay, at magpabaha ng biyaya sa kanilang buhay. Manalangin tayo sa Panginoon.
Na si San Pedro Calungsod, sa kanyang paglilingkod, kabaitan, at katapangan, ay maging huwaran ng kabataang Katoliko habang tinutuklas nila ang kanilang bokasyon sa buhay. Manalangin tayo sa Panginoon.
Na ang mga katekista ay mahamon sa halimbawa ni San Pedro Calungsod sa pagmimisyon at katekesis, at tulad niya, ay maging saksi ng kagalakan ng Ebanghelyo sa kanilang pangangaral at gawa. Manalangin tayo sa Panginoon.
Na makilala natin ang tunay na kayamanan sa ating buhay -hindi sa pag-aari o mga nagawa, kundi kay Kristo na nananahan sa atin, at sa mga taong inihaharap Niya sa atin araw-araw, lalo na ang mga dukha at nababahala. Manalangin tayo sa Panginoon.
Para sa mga yumao na naglingkod kay Kristo, nawa’y makapiling nila Siya at maparangalan ng Ama sa kalangitan. Manalangin tayo sa Panginoon.
Diyos na Walang Hanggan, pinagpapala Mo ang mga mahabagin. Pagkalooban Mo kami ng pusong maawain, tulad ng sa iyong Anak na si Hesukristo, na nabubuhay at naghahari magpakailanman. Amen.
