15,670 total reads
Puspusan ang isinasagawang paghahanda ng Commission on Elections (COMELEC) sa nakatakdang kauna-unahang BARMM Parliamentary Elections.
Sa panayam sa programang Veritas Pilipinas, inihayag ni COMELEC Spokesperson Atty. John Rex Laudiangco na automated election ang gagawin sa BARMM at tatlong uri ng mga kinatawan ang ihahalal ng mga botante.
Nakatakdang ganapin sa Setyembre 14, 2026 ang kauna-unahang halalan para sa mga magiging miyembro ng Bangsamoro Parliament, isang makasaysayang hakbang sa pagpapatupad ng awtonomiya ng Bangsamoro Autonomous Region in Muslim Mindanao o BARMM.
“Sa September 14 nga po, o barely six days to go, ay gaganapin po ang kauna-unahan at pinakamakasaysayang halalan dito sa BARMM—’yung kanilang paghahalal ng kanilang magiging miyembro ng parlamento. Iyan po ay automated elections.” Bahagi ng pahayag ni Laudiangco sa Radyo Veritas.
Kabilang sa ihahalal ang mga kinatawan mula sa parliamentary parties, district representatives, at mga sectoral representatives kung saan may 32 distrito sa BARMM na pipili ng kani-kanilang district representatives, habang kabilang naman sa sectoral representation ang settler communities, kababaihan, kabataan, traditional leaders at ulama.
“Maghahalal po sila ng tatlong klase po ng mga kanilang magiging miyembro ng parlamento: ‘yung parang party-list po nila na ang kanilang ihahalal ay ‘yung mismong partido; ikalawa po, ‘yung kanilang district representatives… tatlumpu’t dalawa po ang distrito diyan; at ‘yung pinakahuli po, maghahalal sila noong mga magiging representante doon sa sektor.” Dagdag pa ni Laudiangco.
Ipinaliwanag din ng COMELEC na ang susunod na halalan para sa Bangsamoro Parliament ay hindi pa sasabay sa 2028 National and Local Elections sa halip ay itatakda kasabay ng 2031 elections.
Samantala, umabot na sa humigit-kumulang 36,000 ang COMELEC checkpoints na inilatag sa BARMM bilang bahagi ng paghahanda para sa halalan.
Ayon kay Laudiangco, pinagplanuhan din ang malawakang deployment ng checkpoints kasama ang Philippine National Police at Armed Forces of the Philippines upang matiyak ang seguridad at maayos na pagsasagawa ng halalan.
“Umabot na po sa 36,000 COMELEC checkpoints ang naitatag na po natin diyan. Ganyan karami po, ‘no? Nagsimula po kami sa 8,000, naging 9, naging 12,000, at ito nga po, 36,000.” Ayon pa kay Laudiangco.
Bukod sa seguridad, magsisilbing lugar din ang mga checkpoint kung saan maaaring lumapit ang mga botante upang mag-report ng mga paglabag o magtanong hinggil sa halalan.
May nakalagay ding mga contact number ng COMELEC officer at team leader sa mga checkpoint upang mas madaling makontak ng publiko ang mga election officials.
Nagbigay rin ng mahalagang paglilinaw si Laudiangco sa mga botanteng hindi pamilyar sa sistema ng pamahalaan sa BARMM partikular na ang pagkakaroon ng Bangsamoro Parliament na hindi nangangahulugang humihiwalay ang rehiyon sa Pilipinas.
“Huwag po magkakamali, ‘no? … baka po isipin nila, hihiwalay na ba ang BARMM sa Pilipinas? May sarili na ba silang gobyerno doon? Hindi po. Ito ay parte pa rin ng ating Saligang Batas, parte pa rin ng Pilipinas.” Ayon kay Laudiangco.
Ipinaliwanag din ni Laudiangco na ang pagkakaroon ng Bangsamoro Parliament ay bahagi ng awtonomiyang ipinagkakaloob sa rehiyon sa ilalim ng Saligang Batas.
“Ito ay parte pa rin ng ating Saligang Batas, parte pa rin ng Pilipinas. At ‘yung Saligang Batas po kasi natin mismo ang nag-utos na mayroon po silang awtonomiya diyan.” Ani Laudiangco.
Sa bahagi ng Simbahan ang halalan ay mahalagang pagpapahayag ng pakikilahok ng mamamayan sa buhay ng lipunan na dapat laging nakatuon sa kapakanan ng buong pamayanan, paggalang sa dignidad ng bawat tao, katarungan at kapayapaan.
