918 total reads
Nanawagan ang Caritas Philippines sa mga institusyon ng Simbahang Katolika na ilipat ang kanilang mga pamumuhunan at financial resources palayo sa mga industriyang nagdudulot ng matinding pinsala sa kalikasan, bilang bahagi ng konkretong pagtugon sa lumalalang climate crisis.
Sa Pastoral Letter para sa 2026 Season of Creation, sinabi ni Caritas Philippines President at San Carlos Bishop Gerardo Alminaza na kailangang makita ang pangangalaga sa kalikasan hindi lamang sa mga panawagan kundi maging sa paraan ng pamamahala ng Simbahan sa kanilang pondo, investments, paggamit ng enerhiya at pakikipag-ugnayan sa mga bangko at financial institutions.
“The ecological conversion we proclaim must become visible in the way our Church institutions consume energy, construct buildings, manage resources, and make investments, leading by example by embracing cleaner and less destructive sources of energy available to us – Divestment, ethical investment, and responsible financial stewardship are therefore not merely economic decisions, but are expressions of faith, integrity, and ecological conversion that ensure our financial choices reflect the values we proclaim,” bahagi pa ng mensahe ni Bishop Alminaza para sa Season of Creation.
Hinimok din ng Caritas Philippines ang mga Catholic institutions na suportahan ang malinis, renewable at sustainable energy gaya ng solar, wind at geothermal energy, pati iba pang angkop na renewable-energy systems.
Binigyang-diin ni Bishop Alminaza na kailangang maging makatarungan ang energy transition—may maaasahan at abot-kayang enerhiya para sa lahat, napoprotektahan ang mga manggagawa at komunidad, at hindi ipinapasa sa mga mahihirap ang malaking gastos sa paglipat sa malinis na enerhiya.
Ayon sa Caritas Philippines, mas lalong nararamdaman ng mga komunidad ang epekto ng climate crisis sa kanilang kabuhayan at ekonomiya, partikular ang mga mahihirap, magsasaka, mangingisda, Indigenous Peoples at manggagawa.
Kabilang sa mga epekto nito ang matinding tagtuyot, bagyo, pagbaha, landslide, matinding init at kakulangan sa tubig.
Muling tinutulan ng Caritas Philippines ang mapanirang large-scale commercial mining at hindi napapanatiling pagtotroso dahil sa pinsala ng mga ito sa kagubatan, watershed, biodiversity at mga komunidad.
Nanawagan din ito ng mas matibay na proteksyon sa natitirang kagubatan at iba pang mahahalagang ecosystem sa bansa.
Sa pastoral letter, iginiit ni Bishop Alminaza na dapat makita ang tinatawag na ecological conversion sa aktuwal na gawain ng mga institusyon ng Simbahan—mula sa paggamit ng enerhiya at pagtatayo ng mga gusali hanggang sa pamamahala ng resources at pagpili ng mga pamumuhunan.
Para sa Caritas Philippines, ang ethical investment, divestment at responsableng pangangasiwa ng pondo ay hindi lamang usapin sa pananalapi. Bahagi rin ito ng pananampalataya at pananagutan ng Simbahan sa pangangalaga sa sangnilikha.
Ang 2026 Season of Creation ay may temang Immersion in Living Water, na isinasalin naman ng Archdiocese of Manila bilang Tubig ng Buhay, Daluyan ng Biyaya.
Isinasagawa ang Season of Creation jmmula Setyembre 1 hanggang Oktubre 4, kapistahan ni San Francis9co ng Assisi, at pinalalawak hanggang Indigenous Peoples’ Sunday.
