26,593 total reads
Binigyang-diin ni Radyo Veritas 846 President Fr. Roy Bellen ang kahalagahan ng sapat na pahinga bilang bahagi ng pangangalaga sa buhay, kalusugan at kabuhayan ng mga manggagawa at kanilang pamilya.
Sa kanyang pagninilay para sa Banal na Misa ng Ika-23 Linggo sa Karaniwang Panahon, ipinaliwanag ni Fr. Bellen na ang konsepto ng Sabbath o araw ng pamamahinga ay hindi lamang tungkol sa pagsunod sa isang utos ng Simbahan, kundi isang paraan upang mapangalagaan ang buhay at kapakanan ng tao.
“Yan po talaga ang diwa ng batas. Hindi lang para sundin, para huwag kang mahuli. Ang diwa po ng batas ay para po ang buhay mapangalagaan. Yan po ang dahilan kung bakit po ang Diyos nagbigay ng sampung utos. Hindi lang para pag yan ay hindi ka sumunod, ikaw ay paparusahan ko,” ayon sa pagninilay ni Fr.Bellen.
Iniugnay rin ni Fr. Bellen ang kahalagahan ng pahinga sa mga gawain na maaaring makasama sa kalusugan at kabuhayan, gaya ng labis na pagpupuyat dahil sa mobile games, walang kontrol na panonood ng online content at higit sa lahat, online gambling.
Binigyang-diin niya na para sa mga naghahanapbuhay, ang tamang pagpapahinga ay hindi luho o simpleng pagpipilian lamang. Mahalaga itong bahagi ng pagpapanatili ng kalusugan at kakayahang magtrabaho upang patuloy na matugunan ang pangangailangan ng pamilya.
“Dagdag pa ng pari, “Ang Sabbath, ang araw ng pamahinga, ay para po pangalagaan ng buhay. Pag nagpapahinga ka, ito po ay pagpahayag ng iyong pananampalataya. Na ang lahat ng bagay ay hindi nakasalalay sa iyong kamay. Kung hindi ang lahat ng bagay nakasalalay sa kamay ng Diyos.”
Kaugnay nito, hinimok din ni Fr. Bellen ang publiko na pangalagaan ang kalikasan bilang bahagi ng mensahe ng Season of Creation.
Ayon sa pari, ang pagkasira ng kapaligiran ay may direktang epekto sa buhay at kabuhayan ng mga tao, lalo na sa mga komunidad na umaasa sa likas na yaman.
Binigyang-diin ni Fr. Bellen na ang tunay na pangangalaga sa buhay ay nangangailangan ng tamang balanse sa pagitan ng pagtatrabaho at pagpapahinga, pananampalataya at responsableng paggamit ng mga biyayang ipinagkakaloob ng Diyos.
