1,146 total reads
Ipagdiriwang ng Holy Cross Parish sa Krus na Ligas, Quezon City ang ika-13 anibersaryo ng pagkakatalaga ng kanilang simbahan sa Setyembre 13, kasabay ng paghahanda para sa Kapistahan ng Exaltation of the Holy Cross o Triumph of the Cross sa Setyembre 14.
Ayon kay Nikkie Francisco, Parish Pastoral Council Secretary ng Holy Cross Parish, isasagawa mula Setyembre 11 hanggang 13 ang Triduum bilang paghahanda sa pagdiriwang.
Kabilang dito ang commissioning ng mga liturgical ministers, gaya ng mga lektor, altar servers, greeters at collectors, extraordinary ministers of Holy Communion at music ministers na sumailalim sa kinakailangang formation.
Ipinaliwanag ni Francisco na mahalagang bahagi ng buhay-parokya ang pagkakatalaga ng simbahan dahil dito pormal na kinikilala at iniaalay ang lugar bilang isang sagradong pook para sa pagsamba.
Bahagi ng ritwal ng dedication ang pagpapahid ng Banal na Krismang Langis sa altar at mga haligi ng simbahan.
Sa panayam kay Francisco sa programang Barangay Simbayanan ng Radyo Veritas, binigyang-diin din niya ang makasaysayang pinagmulan ng Krus na Ligas, na naging kanlungan ng mga Katipunero at ni Andres Bonifacio.
Naging ganap na parokya ang Holy Cross Parish noong Pebrero 10, 1998, habang kinilala bilang simbahan noong 2013 sa panahon ni Father Ron Roberto.
Kaugnay ng anibersaryo, naghanda rin ang parokya ng iba’t ibang community activities, kabilang ang prusisyon sa mismong araw ng kapistahan, salu-salo ng mga parishioner at mga gawaing magbabalik-tanaw sa kasaysayan ng Krus na Ligas.
Patuloy din ang pakikibahagi ng Parish Youth Ministry sa mga programa ng parokya, vicariate at Diyosesis, kabilang ang mga youth activities at paghahanda para sa Marian Exhibit na magsisimula sa Setyembre 15 sa pangunguna ng Legion of Mary, katuwang ang Parish Youth Ministry.
Binigyang-diin ni Francisco na bagama’t maaaring ipagdiwang ang Banal na Misa sa mga kapilyang hindi pa naitalaga, mas nararapat para sa isang parokya na pormal na italaga ang simbahan bilang sagradong lugar.
Inaanyayahan naman niya ang mga mananampalataya mula sa Krus na Ligas at mga kalapit na lugar at parokya na makiisa sa Triduum mula Setyembre 11 hanggang 13 at sa Feast of the Exaltation of the Holy Cross sa Setyembre 14.
