3,641 total views
Mga Kapanalig, sa botong 238 na pabor, 10 na tutol, at 9 na abstain, nagpasyang muli ang Mababang Kapulungan ng Kongreso na suspendihin si Cavite Fourth District Representative Francisco “Kiko” Barzaga.
Una na siyang sinuspinde noong Disyembre dahil sa mga “inappropriate social media posts and misconduct.” Hindi raw akma sa kanyang posisyon ang mga ipino-post niya sa social media. Tumagal ang suspensyon ni Congressman Barzaga ng 60 na araw.
Ang bagong suspensyon—na tatagal muli ng 60 na araw—ay nag-ugat sa reklamo ng mga kapwa rin niya kongresista. Iniugnay kasi ni Congressman Barzaga ang ilang kabaro niya mula sa National Unity Party na tumanggap ng suhol mula sa isang negosyante. Kapalit ng suhol na ito ang pagboto daw nila kay Leyte Representative Martin Romualdez para maging speaker. Inakusahan din niya ang isang yumaong mambabatas na sangkot sa korapsyon kaugnay ng mga flood control projects. Wala naman siyang matibay na ebidensya.
May isa ring congressman na gustong disiplinahin si Leyte Fourth District Representative Richard Gomez. Sa isang privilege speech, hinimok ni Senior Citizens Party-list Representative Rodolfo Ordanes ang Kamara na disiplinahin ang dating artista at ngayon ay congressman dahil sa umano’y pananakit niya kay Philippine Fencing Association president Rene Gacuma, isang senior citizen, noong nagdaang SEA Games sa Thailand. Kung siya ang tatanungin, gusto rin ni Congressman Gacuma na patawan ng 60 na araw na suspensyon si Congressman Gomez.
Kung inyong matatandaan, lumutang ang isang video kung saan sinugod, pinagalitan, at sinaktan ni Congressman Gomez ang pinuno ng Philippine Fencing Association dahil sa desisyon ng huli ukol sa mga manlalarong isinalang sa fencing. Nagbanta pa raw ang kongresista na haharangin ang pagbibigay ng budget sa asosasyon. Sa testimonya ng opisyal ng asosasyon, sinabi niyang tinapakan ang kanyang paa, inipit ang daliri, at minura. Sa nangyaring komprontasyon, nalagay daw sa alanganin ang buhay ng senior citizen na may kondisyon sa puso at altapresyon.
Habang isinusulat natin ang editoryal na ito, wala pang pasya ang Kamara sa kahilingan ng kinatawan ng mga senior citizens.
Mataas dapat ang tingin natin sa mga lingkod-bayad gaya ng mga mambabatas. “Kagalang-galang” o “honorable” nga ang tawag natin sa kanila. Sa ilalim ng Republic Act No. 6713 o ang Code of Conduct and Ethical Standards for Public Officials and Employees, dapat sumunod sa mahigpit na panuntunan ang mga mambabatas pagdating sa tamang pag-uugali at gawi. Dapat silang maging propesyunal, walang pinapaboran, tapat, at patas. Hindi nila dapat abusuhin ang kanilang posisyon—na nangyayari kapag nagpapakalat sila ng malisyosong impormasyon o nananakit ng kanilang kapwa. Akma sa kanila ang paalala sa Tito 2:7 na “maging halimbawa ng mabuting ugali,” lalo na’t tangan nila ang kapangyarihang mula sa mga mamamayang nais nilang paglingkuran.
Ang usapin tungkol sa disiplinang ipinakikita ng ilang kongresista natin ngayon ay maaaring tingnan gamit ang mga panlipunang turo ng Simbahan, partikular na ang tungkol sa pag-iral ng “culture of integrity” o kultura ng katapatan. Kaakibat nito ang wastong pag-uugali, pananalita, at pagkilos. Ang pulitikal na kapangyarihan (o political authority), paalala ng Simbahan, ay dapat ginagamit alinsunod sa mga hangganan ng tinatawag na “moral order”—sa madaling salita, ginagamit ang kapangyarihan sa tama, wasto, at dapat.
Malinaw na labag dito ang pagpapakalat ng malisyosong impormasyon—pati na rin ang mga social media posts na hindi akma sa mga lingkod-bayan. Salungat din dito ang pananakit sa iba—pisikal man o sa salita—lalo na sa matatanda at may sakit. Sa mga kasong ito, may pag-abuso sa posisyong ipinagkatiwala sa kanila.
Mga Kapanalig, ang disiplinang inaasahan lagi sa mga mamamayan ay dapat na unang nakikita sa mga pinuno ng bayan.
Sumainyo ang katotohanan.
