38,574 total reads
Hinimok ni Cebu Archbishop Alberto Uy ang mga Pilipino na huwag hayaang mauwi sa galit at pagkamuhi ang pagkakaiba ng kanilang pananaw, lalo na sa gitna ng matinding pagkakahati ng lipunan.
Sa kanyang pagninilay sa Ebanghelyo, binigyang-diin ng arsobispo ang panawagan ni Hesus na mahalin ang kaaway, gumawa ng mabuti sa mga napopoot at ipanalangin ang mga nananakit.
Ayon kay Archbishop Uy, maaaring hindi magkasundo ang mga tao sa politika at iba pang usapin, subalit hindi ito dahilan para mawala ang paggalang sa kapwa.
Nagbabala rin ang obispo laban sa pagturing sa ibang tao batay lamang sa kanilang political label o paninindigan.
“These are difficult words. But perhaps these are exactly the words our country needs to hear today. We are becoming very polarized. Politics divides us. Elections divide us. Social media divides us. Sometimes even families and friends become divided because of different opinions,” ayon sa mensahe ni Archbihop Uy.
Giit ni Archbishop Uy, dapat tutulan ang korapsyon, kawalang-katarungan at pang-aabuso, subalit hindi dapat mawala ang pagkilala sa dignidad ng taong hindi katulad ng pananaw.
Binigyang-diin din ng arsobispo na hindi dapat tularan ang maling ginagawa ng ating kinakalaban.
Kung tutol sa kasinungalingan, hindi dapat magsinungaling. Kung tutol sa pambu-bully, hindi rin dapat mang-bully, lalo na sa social media.
“If we oppose lies, let us not spread lies ourselves. If we condemn bullying, let us not bully others online. If we oppose hatred, let us not become hateful. If we fight corruption, let us make sure there is no corruption in our own lives,” ayon sa Facebook post ni Archbishop Uy.
Para kay Archbishop Uy, hindi galit ang sagot sa galit.
Sa halip, hinikayat ng punong pastol ng Cebu ang mga mananampalataya na maging tagapagtayo ng tulay sa halip na pader, at matutong gumalang at magmahal sa kabila ng magkakaiba ng pananaw.
