25,340 total reads
Mariing nanawagan si Cardinal Luis Antonio Tagle sa mga lider ng mga bansa na wakasan ang mga digmaan at karahasan sa lipunan.
Ito ang apela ng kardinal sa kanyang homiliya sa funeral mass ng kanyang amang si Manuel ‘Tatay Maning’ Tagle Sr. sa Imus Cathedral nitong September 10.
Inalala ni Cardinal Tagle ang karanasan ng kanyang amang nakaligtas sa karahasan ng digmaan noong World War 2 na nag iwan ng malubhang pinsala sa pamayanan lalo na sa mga pamilya.
Pagbabahagi ng kardinal na 14 na taong gulang lamang noon si Manuel Sr. nang tamaan ng air raid ang lugar na kanilang tinitirhan at kapwa sila ng kanyang ama ang tinamaan na agad ikinasawi ng kanyang lolo, habang nakaligtas si Tatay Maning at dinala sa kanyang katawan ang mga shrapnel ng digmaan hanggang sa kanyang pagpanaw.
“Sa ngalan ni Tatay Maning: please, no more wars. No more widows—women who are made widows without any sense. Please, no more violence that will create wounded young people,” ayon kay Cardinal Tagle.
Dagdag pa ng kardinal na hindi lamang pisikal na sugat ang iniwan ng digmaan sa kanyang ama kundi maging sa kanyang isip at alaala.
“He bore in his body, in his mind, in his memory, the horrors of war,” saad pa ni Cardinal Tagle.
Iniugnay ng kardinal ang karanasan ng kanyang ama sa panawagan para sa kapayapaan at proteksiyon sa mga kabataang maaaring maging biktima ng karahasan.
Aniya, nakaligtas ang kanyang ama sa mga panganib ng digmaan dahil may komunidad at mga taong umalalay sa kanya at binigyang-diin na ang tunay na buhay ay nakaugat sa pakikipag-ugnayan at hindi sa pagkakawatak-watak.
“Life is in communion. Life is in relationship with God, with brothers and sisters, with the whole of society, with the whole of creation. That’s where we find life,” ani ng kardinal.
Sinabi rin ng kardinal na ang pagpanaw ay bahagi ng pagiging kumpleto ng kuwento ng isang tao subalit higit sa pagtatapos malinaw na inilahad sa pananampalatayang Kristiyano na ang kamatayan ay biyaya ng buhay na walang hanggan.
“Without death, no life is ever complete… It is the end that makes the story complete. That’s life. That’s the victory over death. It is not just, ‘You will rise again.’ It is, ‘You will be with me,’” ani Tagle, na tumutukoy sa pangako ni Hesus sa kriminal na ipinako sa krus kasama Niya.
Pumanaw si Manuel “Tatay Maning” Tagle Sr. noong September 6 sa edad na 96. Bago ang kanyang pagpanaw, ipinagdiwang niya at ng kanyang asawang si Milagros ang kanilang ika-70 anibersaryo ng kasal noong August 26 sa Imus Cathedral.
Bagamat nagluluksa, ikinalugod ng kardinal ang iba’t ibang kuwento ng mga taong nakasalumuha ni Tatay Maning at inilarawan bilang isang taong tahimik na naglingkod sa kapwa—bilang Eucharistic minister na naghahatid ng Banal na Komunyon sa mga maysakit at tumutulong sa mga kabataang nangangailangan.
Ayon kay Cardinal Tagle na ang buhay ni Tatay Maning ay isang patotoo na ang kamatayan ay hindi paghihiwalay kundi pagpasok sa walang hanggang pakikipag-ugnayan sa Diyos.
“Others may forget you, but with God remembering you, time is healed by eternal memory.”
Katuwang ni Cardinal Tagle sa banal na misa ang mga lider ng simbahan sa bansa kabilang sina Kalookan Bishop Pablo Virgilio Cardinal David, Papal Nuncio to the Philippines Archbishop Charles Brown, iba pang mga obispo at pari.
