533 total views
Pinaalalahaan ni Cubao Bishop Honesto Ongtioco ang mga mananampalataya na kumapit sa Panginoon upang tuluyang mapaghilom ang anumang sugat na dulot ng mga karahasang lumalaganap sa lipunan.
Ito ay matapos pangunahan ng Catholic Bishops Conference of the Philippines ang pananalangin na tinawag na “Lord Heal our Land Sunday” noong ika-5 ng Nobyembre, 2017 para sa mga biktima ng extrajudicial killings.
Ayon sa Obispo, ang bawat sugat, kasalanan, at kahinaan ay mapaghihilom lamang sa pamamagitan ng dasal, at pagtawag sa Panginoon upang ipagkaloob nito ang kanyang awa na magdudulot din ng pagkakaisa sa lipunan.
“Kapag may sugat dapat paghilumin, lahat tayo sugatan sa kasalanan sa kahinaan sa nangyayari sa ating bayan, kaya panawagan magkaisa tayo dahil sa Diyos lamang tunay na may paghihilom, hindi natin makukuha ito sa ibang paraan, makukuha ito sa dasal, pag-asa sa Diyos, pagtawag sa kanya, sa awa niya, tao’y magkakaisa, tayo’y kanyang mapaghihilom,” pahayag ng Obispo.
Iginiit ni Bishop Ongtioco na ang lahat ng tao ay tinatawagan upang magbago at magbalik loob sa matuwid na daan.
Aniya, maging ang mga Obispo at pari ay tinatawagan din upang magkaisa, magkaroon ng pag-asa at makamit ang pagbabago sa buong bansa.
“Lahat tayo ay tinatawagan ng Diyos, magbalik loob, magbagong loob, yung mga hindi matuwid dapat iwaksi, yan ang paraan. Ang panawagan ng Diyos ay para sa lahat, para sa aming Obispo, pari, lahat kung saan dapat ituwid ang buhay dapat ituwid para magkaisa po tayo lahat may pag-asa, lahat may pagbabago kapag tayo’y umasa sa Diyos.”
Sa tala ng mga Human Rights Advocates umaabot na sa 13,000 ang mga namatay dahil sa Extrajudicial killings habang sa datos naman ng pulisya ay 4,000 lamang ang mga drug related killings.
