483 total views
Kapanalig, marami sa atin nag-alala kung ano ba ang ating kakaharapin sa ating pagtanda. Ang retirement ba ay nangangahulugan ng boredom o pagkabagot? O ito ba ay maaaring isang yugto ng buhay na dapat nating “excited” at masayang harapin?
Ang World Bank ay may isang pag-aaral na ginawa ukol sa pagtanda na may pamagat na Golden Aging: Prospects for Healthy, Active, and Prosperous Aging in Europe and Central Asia. May mga nilalaman ito na maari nating kunan ng leksyon at gawan ng praktikal na aplikasyon sa buhay Filipino.
Ayon sa pagsusuring ito, ang epekto ng pagtanda sa “productivity” ay iba iba at hindi “alarming” gaya ng nakasanayang persepyon. Ayon dito, “The aging brain experiences a decline in certain cognitive functions but also shows a remarkable ability to compensate by improving performance in other functions, particularly verbal and social skills.” Humihina man ang nakakatatanda sa ibang aspeto ng trabaho, pero mas lumalakas ang pwersa nito sa iba pang aspeto, na maaring mas importante sa maraming mga industriya ngayon. Dagdag pa ng pag-aaral: Ang mga ebidensya ay nagsasabi na may kamangha-manghang abilidad ang katawan, utak at personalidad ang tao na punan ang kanyang kahinaan at palakasin pa ang mga bagong kasanayan.
Nakita rin ng pag-aaral na ito na ang mga elderly ay hindi pinakamahirap na grupo sa Europa at Central Asia, at ang pagtanda ay hindi naman kailangang magdulot ng mas mataas na antas ng kahirapan. Nakakatulong ng malaki ang pensyon, at ang pamumuhay kasama halimbawa ang anak, upang maka-alpas sa kahirapan. Sa aspetong ito, importante ang polisiya ng isang bansa upang maging komprehensibo at sustainable ang sistema ng pension.
Ayon sa Ageing Asia, sa ating bansa, tumataas ang bilang ng mga elderly. Noong 2000, 4.6 million ang mga senior citizens, o 6% ng kabuuan ng populasyon. Matapos ang isang dekada, naging 6.5 million na ito o 6.9% ng populasyon. Inaasahang pagdating ng 2030, aabot na ng 11.5% ng populasyon ang senior citizens.
Ito ay isang scenario na dapat nating paghandaan. Sistema ang dapat ayusin, hindi lamang sa pension, kundi sa health care at lifestyles na rin. Ang pagtanda ay yugto ng buhay na maaring ating maging golden age, kung saan tayo ay mas masaya, masigla, at mayaman, at higit sa lahat mas malapit sa Diyos.
