337 total views
Hinihikayat ni Manila Archbishop Luis Antonio Cardinal Tagle ang mga mananampalataya na dumalo sa isasagawang Philippine Conference on New Evangelization sa Universtiy of Sto. Tomas simula ika-28 hanggang ika-30 ng Hulyo, 2017.
“Ang ebanghelisasyon po ang misyon ng simbahan ay mula pa sa umpisa at malamang ay hindi na magbabago. Kaya lang po nagbabago ang mundo, nagbabago ang kalagayan sa lipunan, kalagayan ng ating pamilya, kabataan at ang ating kalikasan kaya nung panahon ni Pope John Paul II sabi niya kailangan natin ng ‘new evangelization,” ayon kay Cardinal Tagle.
Ayon kay Cardinal Tagle,chairman ng P-C-N-E, mahalaga ang evangelization dahil ito ay pagpapadama ng pag-ibig ng Diyos sa sangkatauhan na kinakailangang pagyabungin sa patuloy na pagpapahayag.
Ipinaliwanag ni Cardinal Tagle na laging new ang evangelization dahil nagbabago ang panahon.
“Bagama’t ang ebanghelisasyon ay laging nariyan at kung tutuusin ay laging ‘new’ dahil nagbabago ang panahon. Hamon yan sa atin ngayon. Tatlong bagay ano yung ‘new’, ang ebanghelyo ay iyon pa rin. Kaya lang sabi niya bagong sigla, new fervor; ikalawa bagong expression-paano ipahahayag ang ebanghelyo sa pamamaraan para tutugma sa ating mentalidad at kultura sa kasalukuyan; at ikatlo bagong metodolohiya”.mensahe ni Cardinal Tagle
Ipinaliwanag ng Kardinal na ang “new” ay hindi nangangahulugan ng pagbabago sa turo ng Diyos sa halip pagbibigay lamang ng bagong sigla, bagong paraan at bagong pagpapahayag ng ebanghelyo na akma sa nagbabagong kultura.
Unang inilunsad ang P-C-N-E noong 2014 na may temang “God Make All Things New; nasundan noong 2015 sa temang Blessed Are You-kasunod na rin ng pagdalaw ng Santo Papa Francisco sa bansa, bilang pakikisa sa mga biktima ng bagyong Yolanda at 2016 bilang pagpapatuloy ng panawagan ng Santo Papa sa Jubilee Year of Mercy, ang Awa, Unawa at Gawa: The Filipino Experience on Mercy.
Noong 2015, sa pagdalaw ni Pope Francis sa Pilipinas umabot sa pitong milyon katao ang dumalo sa misa na isinagawa sa Luneta, Manila.
Sa homiliya ni Pope Francis, binigyan diin ang natatanging pagkakakilanlan ng mga Filipino bilang isang pamilya sa kabila ng mga unos ng buhay.
Taong 2013 nang manalasa ang bagyong Yolanda sa bansa na nagdulot ng labis na pinsala sa Visayas region.
Bukod kay Cardinal Tagle, kabilang sa dumalo sa PCNE press conference sina Fr. Jason Laguerta, head of the Office for the Promotion of New Evangelization; Dr. Giovanna Fontanilla, mula sa Office of Public Affairs ng University of Santo Tomas; at Ms. Mary Ann Cruz of the Central Committee of PCNE.
