517 total reads
Kinakailangang ipanalangin ng sambayanan ang mga lingkod bayan upang ganap na makapaglingkod ng tapat sa kanilang tungkuling sinumpaan.
Inihayag ni Caloocan Bishop Emeritus Deogracias Iniguez – Chairman ng Ecumenical Bishops Forum, ang kahalagahan ng pananalangin ng bawat mamamayan upang magabayan ang bawat opisyal ng bayan na maglingkod ng tapat sa kanilang panunungkulan.
Paliwanag ng Obipo, mahalaga ang pakikiisa ng bawat mamamayan upang ipapanalangin ang kabutihan at malinis na intensyon ng mga lingkod bayan sa kanilang mga posisyon.
“Ang lahat lalong lalo na yung naglilingkod sa atin para maisaayos ang buhay natin sa lipunan, dapat makiisa tayo at isa sa mga mabibisang pakikiisa sa kanila ay ang pananalangin para sila’y talagang kumilala sa Diyos at sa kalooban ng Diyos at magampanan nila yung kanilang mga ginagawa bilang pakikiisa sa Pangioong Diyos na siyang namamahala talaga sa atin,” panawagan ni Bishop Iniguez.
Kaugnay nito, nakakuha ng positive 83% rating ang Pangulong Duterte sa isinagawang survey ng Pulse Asia sa pagtatapos ng taong 2016 habang umabot naman sa positive 61-percent ang net satisfaction rating ng administrasyong Duterte sa isinagawang survey ng Social Weather Stations sa parehong panahon na kumakatawan sa tiwalang ipinagkakaloob ng mga mamamayan sa layunin ng pamahalaan na mapabuti ang kalagayan ng bawat isa.
