289,137 total reads
Mga Kapanalig, nasorpresa rin ba kayo sa rally na isinagawa ng mga miyembro ng Iglesia ni Cristo (o INC) noong Martes sa EDSA? Dahil walang abiso sa publiko o permit man lang mula sa lokal na pamahalaan, maraming naipit sa traffic at na-late sa kanilang trabaho at pasok sa eskwelahan. Humingi si Senador Alan Peter Cayetano ng paumanhin sa publiko pero depensa niya, sadyang nakaaabala talaga ang mga protesta “para magising tayo sa nangyayari.” Para makarating sa kinauukulan at nakararami ang panawagan ng mga nagra-rally, kailangan daw mang-abala.
Pero ano nga ba ang panawagan ng protestang pinangunahan ng mga miyembro ng INC?
Ayon sa tagapagsalita ng INC, nais nilang ipakita ang kanilang suporta sa kapwa miyembro nilang si Senador Rodante Marcoleta. Nauna nang sinabi ni Ombudsman Crispin Remulla na sasampahan ng plunder case ang senador kaugnay ng campaign donations na hindi niya isinama sa kanyang Statement of Assets, Liabilities, and Net Worth (o SALN) at sa kanyang Statement of Contributions and Expenditures (o SOCE). Giit ni Senador Marcoleta, pribadong indibidwal naman daw ang nagbigay ng donasyon sa kanya. Ginigipit daw siya ng kasalukuyang administrasyon dahil gusto niyang imbestigahan ang mga maanomalyang flood control projects.
Naniniwala ang INC na itinataguyod ng senador ang “transparency, accountability, justice, and peace”. Kaisa daw sila ng senador sa mga paninindigang ito. Tinatayang nasa sampung libo ang dumalo sa protesta. Pero hindi pa rin nila napigilan ang pagsasampa ng Ombudsman ng kasong plunder laban kay Senador Marcoleta.
Sa gitna ng sorpresang rally na hindi napaghandaan ng kinauukulan kaya nauwi sa matinding trapik, maraming tanong ang lumilitaw. Kung para sa katotohanan at pagpapanagot ang protesta, bakit ayaw nilang gumulong ang kaso laban kay Senador Marcoleta? Kapag gumulong ang kaso, hindi ba lalabas ang katotohanan tungkol sa ibinibintang sa senador na kapatid nila sa pananampalataya? Hindi ba magkakaroon ng puwang sa pagpapanagot o accountability na panawagan nila?
Kabalintunaan din ang dala sa protesta ng ilang personalidad na dumalo. Naroon si Senadora Imee Marcos na miyembro ng pamilyang hanggang ngayon ay hindi humihingi ng paumanhin at hindi napananagot sa malawakang pagnanakaw noong nakaupo sa puwesto ang tatay nila ni PBBM. Kung para sa katarungan at kapayapaan ang protesta, bakit kaya naroon ang kinatawan ng pamilyang nagkait ng katarungan sa mga kritikong ipinapatay ng diktadura at nagdulot ng kaguluhan sa ating bayan? Nagawa pang magsalita ng senadora sa lugar kung saan nagsimula ang mapayapang pagpapatalsik ng taumbayan sa tatay niyang diktador.
Iginagalang ng Simbahang Katolika ang karapatan ng sinumang tao o grupo na magpahayag ng kanilang saloobin lalo na kung para ito sa katotohanan, pananagutan, katarungan, at kapayapaan. Pero walang pinipiling tao ang katotohanan. Sa mga panlipunang turo ng ating Simbahan, tungkulin ng bawat mananampalataya na palaging hanapin ang katotohanan. Kaakibat nito ang pagpapanagot sa mga lider ng bansa, sapagkat salungat sa tunay na layunin ng pulitika ang katiwalian at pang-aabuso sa kapangyarihang ipinahiram sa kanila ng taumbayan. Hindi natin makakamit ang isang makatarungan at mapayapang lipunan kung walang katotohanan at kung hindi mapapanagot ang mga lumalabag sa batas.
Mga Kapanalig, mahalaga ang papel ng protesta sa aktibong pakikilahok ng taumbayan sa pamamahala. Tungkulin ng isang responsableng Kristiyano ang makibahagi sa mga mapayapang pagkilos. Pero suriin nating mabuti ang panawagan ng mga dadaluhan nating protesta. Siguruhin nating sa bawat placard at sa bawat salitang namumutawi sa mga sigaw ay humahatol tayo nang may katuwiran, katulad nga ng paalala sa Mga Kawikaan 31:9. Nawa’y maging daan ang bawat protestang ating sasalihan o ang iba pang anyo ng pakikilahok tungo sa pagsusulong ng katotohanan, pagpapanagot, katarungan, at kapayapaan.
Sumainyo ang Katotohanan.
