7,331 total reads
Hinimok ni Dr. Dave dela Cruz, OP, pangulo ng Order of Preachers (Dominican) Laity–San Roque Chapter sa Marikina City, ang mga layko at kabataang Katoliko na maging aktibong saksi ni Kristo sa pamamagitan ng social action.
Ito ang mensahe ni Dela Cruz sa kanyang talakayang “Frassati and the Layman’s Place in Social Action,” na bahagi ng Youth Social Action Talks sa Frassati Day 2026 sa Manila Cathedral bilang paggunita sa unang kapistahan ni San Pier Giorgio Frassati bilang santo.
Aniya, ipinakita ng buhay ni San Pier Giorgio Frassati na ang isang ordinaryong layko ay maaaring maging pambihirang lingkod ni Kristo sa pamamagitan ng panalangin, Eukaristiya at paglilingkod sa kapwa.
Binigyang-diin ni Dela Cruz na hindi tinatawag ang mga Katoliko na maging “neutral spectators” sa lipunan kundi mga taong kumikilos upang ipagtanggol ang dignidad ng tao at isabuhay ang Ebanghelyo.
“Catholics are not called to be neutral spectators of society… All of us Catholics are called to be people of prayer, but not only of prayer, people of action, willing to defend the teachings of Jesus and the dignity of the human person,” pahayag ni Dela Cruz.
Sinabi niya na ang tunay na Catholic social action ay nakaugat sa pananampalataya kay Kristo at hindi sa ideolohiya o pansariling ambisyon.
Ipinaliwanag din ni Dela Cruz na nagsisimula ang tunay na pagbabago ng lipunan sa personal na pagbabagong-loob sa pamamagitan ng panalangin, Sakramento ng Kumpisal at marapat na pagtanggap sa Eukaristiya.
“Before social transformation, there must be personal conversion,” saad ni Dela Cruz.
Hinimok din niya ang mga kabataan na dalhin si Kristo sa kanilang pamilya, paaralan, pamayanan at iba pang larangan ng lipunan sa pamamagitan ng tapat na paglilingkod.
Idinagdag pa ni Dela Cruz na hindi dapat matakot ang mga kabataan na isabuhay ang kanilang pananampalataya at dalhin ang pag-ibig, katotohanan at katarungan ni Kristo sa lipunan.
“When you do social action, our place is in the heart of the Church. And from there, our place will be in the heart of the world… May we be like [St. Pier Giorgio Frassati], choose the path of loving God and the Church by serving the least, the last, and the lost,” ayon kay Dela Cruz.
