287 total views
Nanawagan si Taytay Bishop Broderick Pabillo na pairalin ang katarungan, dayalogo, at pagkakasundo bilang tunay na landas tungo sa pangmatagalang kapayapaan, sa halip na umasa sa dahas at paggamit ng armas.
Sa pagninilay ng ika-14 na Linggo sa Karaniwang Panahon, iginiit ng obispo na hindi nalulutas ng karahasan ang mga ugat ng sigalot maging sa pandaigdigang pamayanan o sa Pilipinas.
“Hindi ang dahas at armas ang magbibigay ng kapayapaan, kundi ang katarungan at pakikipagkasundo. Hindi barilan kundi pag-uusap. Hindi pagbibintang tulad ng red-tagging kundi tiwala sa kapwa tao,” ayon kay Bishop Pabillo.
Tinukoy ng obispo ang nagpapatuloy na mga armadong tunggalian sa iba’t ibang bahagi ng mundo, kabilang ang tensyon sa Gitnang Silangan, bilang patunay na hindi nagdudulot ng pangmatagalang kapayapaan ang paggamit ng puwersang militar.
“Ang mga ito, na nagkakahalaga ng mga bilyong dolyar, ay hindi naman nagdala ng kapayapaan. Kailangan silang mag negotiate at mag-usap upang magkasundo… Mas mabisa ang paraan ng Espiritu kaysa sa paraan ng mundo,” dagdag pa ng obispo.
Inihalintulad din ni Bishop Pabillo ang sitwasyon sa Pilipinas kung saan sinabi nitong mas magiging mabisa ang pagtugon sa kahirapan at kawalan ng kabuhayan kaysa sa patuloy na paggastos sa armadong kampanya laban sa rebelyon.
“Kung ang perang ginamit sa pagbili ng armas at ang perang ginamit sa pagpapadala ng maraming sundalo ay ginamit na tumulong sa mga walang lupa at walang trabaho, sa pagtulong sa mga magsasaka, mga manggagawa, at mga mangingisda, nawala na ang rebelyon noon pa,” giit pa ni Bishop Pabillo.
Paliwanag ng obispo na ang tunay na tagumpay ayon sa Ebanghelyo ay hindi nakasalalay sa pagkatalo ng kaaway kundi sa pagtatagumpay ng katarungan at pagkakasundo.
“Ang tagumpay ng Diyos ay napapakita sa tagumpay ng katarungan. Nagkaroon ng kapayapaan, hindi dahil natalo ang kaaway, kundi dahil nagkaroon ng pakikipagkasundo,” ani Bishop Pabillo.
Hinimok din ng obispo ang mga mananampalataya na mamuhay ayon sa Espiritu ng Diyos sa pamamagitan ng pagpapakumbaba at ganap na pagtitiwala sa Panginoon, sa halip na umasa lamang sa kapangyarihan, kayamanan, at sariling kakayahan.
Ayon kay Bishop Pabillo, ang kapayapaang ipinagkakaloob ni Kristo ay nakakamit sa pagsunod sa Kanyang kalooban, paglilingkod sa kapwa at pagtataguyod ng pagkakasundo sa halip na pagkakahati-hati at patuloy na karahasan.
