2,015 total reads
Hinimok ng bagong obispo ng Diocese of Tagbilaran ang mga mananampalataya na sama-samang maglakbay at itaguyod ang isang Simbahang bukas para sa lahat.
Umaasa si Bishop Crispin Varquez na magkakaisa ang simbahan, pamahalaan at lahat ng sektor sa pagtataguyod sa misyon ng simbahan kasabay ng pagsisimula sa kanyang gawaing pastoral sa diyosesis na may mahigit sa isang milyong nasasakupan.
“I want to journey with you. Allow me to walk with you. And most of all, allow me to love you,” mensahe ni Bishop Varquez kasunod ng kanyang installation at canonical possession sa Tagbilaran Cathedral nitong Oct. 27.
Apela ng obispo sa mamamayan, lalo na sa mga lider ng pamahalaan, na tiyaking hindi mabubura ng pag-unlad ng turismo at ekonomiya ng lalawigan ang kultura, pananampalataya, at pagkakakilanlan ng mga Boholano.
Aniya, dapat igalang ng turismo ang kalikasan, pangalagaan ang dignidad ng mga manggagawa at komunidad, kasabay ng paglago ng ekonomiya, at tiyaking naisasalin sa susunod na henerasyon ang mayamang tradisyon na humuhubog sa mga Boholano.
“The true measure of progress is not simply the number of tourists who come here, nor merely the employment generated by tourism… “Let Bohol welcome the world without losing our identity as Boholano people,” ayon pa sa obispo.
Hinimok din ng pastol ang mga lingkod ng Simbahan na panatilihin ang diwa ng synodality o sama-samang paglalakbay, kabilang ang pagiging bukas sa mga mungkahi at sa pagtutuwid.
Ayon sa obispo, hindi niya kayang harapin nang mag-isa ang mga hamon sa kanyang bagong ministeryo, kaya mahalaga ang pagkakaisa at pagtutulungan ng buong lokal na Simbahan.
Kaugnay nito, sa homiliya ni Manila Archbishop Jose Cardinal Advincula, binigyang-diin niya ang kahalagahan ng kababaang-loob at pagiging payak sa paglilingkod bilang isang obispo tulad ng episcopal motto ni Bishop Varquez na Humilitas et Simplicitas.
Ipinaalala ni Cardinal Advincula na ang tunay na pamumuno sa Simbahan ay nakaugat sa pagkilala sa Diyos bilang pinagmumulan ng buhay at biyaya.
“Humility means remembering that we are creatures, not the Creator; that we are finite and limited, not almighty or all-knowing; and that our lives remain in the hands of God, who gives us life,” ani Cardinal Advincula.
Ipinaliwanag din ng kardinal na sa kabila ng kakayahan, karanasan at mga nagawa ng isang obispo, mahalagang manatili itong mapagpakumbaba at handang sumunod sa paggabay ng Diyos.
“At its core, simplicity means having a heart that is not complex, a heart that is not complicated by desires and attachments that pull it apart, because it is a heart that belongs only to Jesus, a heart that focuses always on Jesus,” dagdag pa ng kardinal.
Binigyang-diin naman ni Bishop Varquez na ang pangunahing misyon ng Simbahan ay ang pagpapalaganap ng Mabuting Balita at ng pagmamahal ni Kristo.
“The Church exists because of the mission—no other reason, because of the mission,” aniya.
Hiniling ng bagong obispo ang panalangin, pakikiisa, at suporta ng mga mananampalataya upang maipagpatuloy at mas mapalawak pa ang ebanghelisasyon sa lalawigan, hindi lamang sa pamamagitan ng salita kundi sa kabanalan ng buhay, kababaang-loob, at pagmamahalan.
Pinasalamatan din ni Bishop Varquez ang mananampalataya ng Eastern Samar na kanyang nakasama sa paglalakbay sa loob ng 19 na taon kung saan magkaisang hinarap ang mga hamon tulad ng mapanganib na kalamidad ng Bagong Yolanda noong 2009.
Si Bishop Varquez, na inordinahang pari ng Tagbilaran, ay itinalagang obispo ng Diocese of Borongan noong 2007, at makalipas ang halos dalawang dekada ay naitalagang ikawalong obispo ng Tagbilaran noong September 10, isang taon matapos ang pagiging sede vacante.
Pinangunahan ni Cebu Archbishop Alberto Uy ang pagluklok kay Bishop Varquez, katuwang si Papal Nuncio to the Philippines Archbishop Charles Brown.
Dumalo sa pagtitipon ang daan-daang mananampalataya ng Bohol at Borongan gayundin ng mahigit sa 50 mga obispo mula sa iba’t ibang diyosesis sa bansa.
