922 total reads
Ikinabahala ni Kalookan Bishop Pablo Virgilio Cardinal David ang pagpasok ng tubig baha sa makasaysayang Betis Church sa Guagua, Pampanga matapos ang ilang araw na tuloy-tuloy na pag-ulan.
Sa mensahe ng Cardinal sa kanyang personal na Facebook account, sinabi ni Cardinal David na masakit para sa kaniya na makita ang makasaysayang Simbahan na pinasok ng tubig baha, kabilang ang makasaysayang sahig nitong yari sa kahoy.
“It pains me to see our beloved Betis Church like this,” Bahagi ng pahayag ni Cardinal David.
Ayon sa Cardinal, kabilang ang Betis Church sa mahahalagang heritage churches ng bansa at isa sa iilang Simbahan na nananatili ang orihinal na wooden floor, na ilang henerasyon nang tinahak ng mga mananampalataya.
Nanawagan si Cardinal David ng panalangin na agad ng humupa ang ulan at bumaba ang tubig baha upang maiwasan ang mas malaking pinsala sa Simbahan.
“We pray that the rains subside and the waters recede soon,” Ani Cardinal David.
Binigyang-diin din ng Cardinal ang pangangailangang pangalagaan ang makasaysayang Simbahan, na una ng nakaligtas sa pagsabog ng Bulkang Pinatubo at ngayon ay humaharap naman sa lumalaking banta ng climate change.
“May this precious heritage church, which survived Pinatubo, also survive the growing threats of climate change.” Dagdag pa ni Cardinal David.
Ang Santiago Apostol Parish Church na mas kilala bilang Betis Church sa Guagua, Pampanga ay kilala rin sa mahalagang papel nito sa kasaysayan at sining ng Simbahan sa Pilipinas, ay patuloy na nagsisilbing tahanan ng pananampalataya ng mga taga-Pampanga.
