13,477 total reads
Umapela ng tulong pinansyal ang Archdiocese of Nueva Segovia sa Caritas Manila para sa mga pamilyang matinding naapektuhan ng Bagyong Maymay at pinalakas na Southwest Monsoon o Habagat sa Ilocos Sur.
Ibinahagi ni Nueva Segovia Archbishop David William Antonio kay Caritas Manila Executive Director Rev. Fr. Anton C.T. Pascual ang lawak ng pinsala na naidulot ng tuloy-tuloy na pag-ulan, pagbaha, pagguho ng lupa at storm surge sa lalawigan.
Ayon sa ulat ni Archbishop Antonio, batay sa paunang datos mula sa Provincial Disaster Risk Reduction and Management Office at Parish Social Action Coordinators, 4,192 pamilya o 12,641 indibidwal ang malubhang naapektuhan ng kalamidad.
Naitala rin ang 26 na partially damaged houses at isang totally damaged na bahay, partikular sa ilang komunidad sa southwestern portion ng Ilocos Sur.
Dahil dito, umapela ng tulong pinansyal ang Arsobispo sa Caritas Manila upang matulungan ang mga apektadong komunidad na makabangon mula sa pinsala.
“We heartily ask your good office for financial assistance to help the affected communities and be an instrument of God’s love, mercy, and compassion,” Bahagi ng mensahe ni Archbishop Antonio.
Bukod sa tulong pinansyal, hiniling din ng Arsobispo ang patuloy na panalangin para sa mga residenteng nakararanas ng takot at pangamba dahil sa epekto ng bagyo at Habagat.
“May we also ask for your fervent prayers, that the people of Ilocos Sur and other provinces as well may overcome their fears and uncertainties,” Apela ni Archbishop Antonio.
Nanawagan din ang Arsobispo ng pananalig at katatagan sa mga pamilyang naapektuhan, habang patuloy na tumutugon ang Simbahan sa kanilang mga pangangailangan.
Sa panahon ng kalamidad, muling ipinakikita ng mga pagkilos ng mga diocesan social action ministry at Caritas network ang panawagan ng Simbahan na ang pagmamahal sa Diyos ay ganap na naisasabuhay sa pamamagitan ng konkretong pagtulong, pakikiisa at pagkalinga sa mga higit na nangangailangan.
