14,651 total reads
Nanawagan ng tulong partikular ng emergency relief assistance ang Caritas Tarlac sa Caritas Manila para sa mga pamilyang Aeta sa Sitio Tala, Barangay Mababanaba, San Jose, Tarlac na nahaharap sa kakulangan sa pagkain dahil sa patuloy na pag-ulan.
Ipinaabot ni Caritas Tarlac Executive Director Rev. Fr. Randy M. Salunga kay Caritas Manila Executive Director Rev. Fr. Anton C.T. Pascual ang matinding epekto ng ilang linggong pag-ulan sa kabuhayan ng mga katutubong pamilya sa lugar.
Ayon kay Fr. Salunga, hindi makapaghanapbuhay at makapagsaka ang mga residente dahil sa masamang panahon at mapanganib na kondisyon, dahilan upang mawalan sila ng agarang pinagkukunan ng pagkain.
Partikular na humingi ng tulong ang Caritas Tarlac para sa mga pangunahing pangangailangan ng mga apektadong residente tulad ng food packs o relief goods, kabilang ang bigas, de-lata at iba pang pangunahing pagkain.
“Due to the inclement weather and dangerous conditions, these families have been completely unable to engage in their daily livelihood and farm work. Consequently, they are currently facing critical food shortages and have no immediate source of food to eat.” Bahagi ng mensahe ni Fr. Salunga.
Pagbabahagi ng Pari, hindi bababa sa 100 pamilyang Aeta sa Sitio Tala ang apektado ng masamang panahon na agarang nangangailangan ng tulong.
Nagpasalamat din si Fr. Salunga sa patuloy na suporta ng Caritas Manila sa mga komunidad na dumaranas ng sakuna at krisis sa iba’t ibang bahagi ng bansa.
“Thank you for always being there for us whenever our diocese and communities face adversity. Your unwavering brotherhood, constant generosity, and swift compassion have always been a pillar of strength for Caritas Tarlac.” Dagdag pa ni Fr. Salunga.
Samantala, muli ring ibinahagi ng Pari ang mahalagang papel ng Caritas network ng Simbahan sa pagtugon sa kagyat na pangangailangan ng mga mahihirap at higit na apektado ng kalamidad, hindi lamang sa pagbibigay ng pinansyal at materyal na tulong kundi sa pagiging konkretong tanda ng pagkakapatiran, malasakit at pag-asa sa panahon ng pagsubok.
