1,057 total reads
Nanawagan si Fr. Lino Gregorio Redoblado, OFM, sa mga religious superiors na gawing konkretong misyon ang pagiging tagapagsulong ng kapayapaan sa pamamagitan ng pananatili sa piling ng mga sugatan, inaapi at nangangailangan.
Sa kanyang closing homily sa Second National Convention ng Conference of Major Superiors in the Philippines o CMSP sa Zamboanga City, sinabi ng chairperson ng kapulungan na kailangang manatiling nakaugat kay Kristo ang mga consecrated persons habang tumutugon sa mga sugat ng lipunan at ng sangnilikha.
Iginiit ni Fr. Redoblado na hindi maaaring ihiwalay ang misyon ng mga relihiyoso sa kalagayan ng mga taong nakararanas ng kahirapan, karahasan, displacement, diskriminasyon at iba pang anyo ng pagdurusa.
“At the heart is Christ. And wherever Christ is hungry, wounded, displaced, rejected, silenced, or suffering in creation, there the consecrated person must be found,” ayon kay Fr. Redoblado.
Binigyang-diin din ng pari na ang pagiging propeta ay nagsisimula sa malalim na ugnayan sa Diyos, hindi sa dami ng mga gawain o programa.
“We can become so busy with the work of God that we slowly forget the God for whom we are working. But prophecy does not begin with activity. Prophecy begins with intimacy with God,” aniya.
Ayon kay Fr. Redoblado, mahalaga ring matutong makinig ang mga religious leaders sa Diyos, sa isa’t isa, sa mga mahihirap at sa daing ng kalikasan bago magsalita bilang mga propeta ng kapayapaan.
Hinamon din niya ang mga consecrated persons na huwag manatiling tahimik sa harap ng mga suliraning panlipunan, kabilang na ang malawakang korapsyon, paglaganap ng disinformation at iba pa.
“To remain with the wounded means eventually to stand on the side of the poor—for truth over disinformation, justice over corruption, dignity over exploitation, dialogue over polarization, safeguarding over abuse, and solidarity over indifference,” dagdag ni Fr. Redoblado.
Samantala, iginiit ni Fr. Redoblado na bahagi rin ng pagiging propeta ng kapayapaan ang pangangalaga sa kalikasan, dahil magkaugnay ang daing ng mga mahihirap at ng sangnilikha.
“The cry of the poor and the cry of the Earth are one cry. When forests, rivers, and mountains are destroyed, the poor and Indigenous Peoples often suffer first,” giit ng pari.
Hinimok niya ang mga kalahok na huwag hayaang matapos kasabay ng convention ang hamon na kanilang narinig at naranasan.
Apela nitong isabuhay ang apat na hakbang ng convention—Mulat, Dama, Tindig at Paghayo—bilang konkretong tugon sa isang mundong sugatan.
Dinaluhan ng 233 religious superiors mula sa 159 na kongregasyon ang limang araw na CMSP National Convention mula Sept.1 hanggang 5 sa Zamboanga City na nakatuon sa temang “Consecrated Men and Women: Prophetic Witnesses of Peace in a Wounded World.”
