391 total views
Karaniwan na sa mga Obispo ng Simbahang Katolika ang naglalakad ng walang armas at walang body guards sa mga ordinaryong lansangan na hindi kayang gawin ng Pangulong Rodrigo Duterte.
Ito ang pahayag ni Novaliches Bishop-Emeritus Teodoro Bacani Jr., kaugnay na rin sa panawagan ng Pangulo sa mga ‘tambay’ na holdapin at patayin ang mga obispo na kanilang makikita sa kalye.
Ayon kay Bacani, kung talagang matapang Pangulo ay maari niyang subukan ang ginagawa ng mga Obispo na maglakad sa lansangan ng walang pag-aalinlangan.
“Meron lang akong friendly challenge kay Presidente Duterte, simple lang na ganito. Alam niyo kaming mga Obispo naglalakad kami, wala kaming body guard, wala kaming bullet-proof vests, wala kaming mga security aids na nakapaligid na marami, wala kaming dalang baril, gano’n kami; ang challenge ko kay President Duterte kung talagang matapang siya, simple lang, gawin niya yung ginagawa namin,” ayon kay Bishop Bacani.
Inihayag ng Obispo na dito malalaman kung ano ang magiging reaksyon ng publiko sa Pangulo habang ang mga Obispo ay isang karaniwan ng gawain ang pakikihalubilo sa iba’t ibang uri ng tao sa bawat araw.
Nilinaw ni Bishop Bacani na hindi na bago ang mga ganitong pahayag ng Pangulo na isa namang biro laban sa Simbahan, mga Obispo, mga Pari at pananampalatayang Katoliko.
Unang umalma si Balanga, Bataan Bishop Ruperto Santos sa mga pahayag ng punong ehekutibo.
Read: Pangulong Duterte, kabiguan at kahihiyan sa bansa
Una na ring inihayag ng Santo Papa Francisco sa kaniyang mensahe sa ‘52nd World Day of Peace 2019’ ang ‘Good Politics is at the Service of Peace’.
Binigyan diin nito ang malaking ang tungkulin na ginagampanan ng mga opisyal ng pamahalaan sa pagkamit ng pangkalahatang kapayapaan sa buong daigdig.
Paliwanag ng Santo Papa, ang pulitika ay isang mahalagang paraan ng pagtatayo ng mga komunidad at institusyon ng tao, ngunit kapag ang buhay pampulitika ay hindi nakikita bilang isang uri ng serbisyo sa lipunan sa kabuuan, maaari itong maging isang paraan ng pang-aapi, marginalisasyon at kahit ng pagkakawatak-watak.
