140 total views
Mga Kapanalig, noong isang linggo panandaliang nahinto ang Maginhawa community pantry matapos i-red-tag ang organizer nito na si Ana Patricia Non. Maraming napukaw sa inisyatibong ito ni Non, at nagtayo rin ng community pantries sa kani-kanilang lugar. Bagamat hindi pangmatagalan, nakatulong ang community pantries na tugunan ang pangunahing pangangailangan ng mga tao sa gitna ng pandemya at kakulangan ng ayuda mula sa pamahalaan.
Sa kabila ng magandang layunin ng mga community pantries, pinaghinalaan ni Lieutenant General Antonio Parlade, Jr., ang tagapagsalita ng National Task Force to End Local Communist Armed Conflict (o NTF-ELCAC), ang biglang pagsulpot ng mga community pantries sa bansa. Ipinagtataka niya ang mabilis na pagdami ng mga ito. Inihalintulad pa ng heneral si Non kay Satanas na nagbigay daw ng mansanas kay Eba na siya namang simula ng pagkakasala ng tao. Gamit ang mga maling detalyeng ito mula sa kuwento ng paglikha, ipinahiwatig ng heneral na tila may masamang intensyon sa likod ng mga community pantries at mukhang organisado ang pagbubukas nito sa iba’t ibang lugar. Inamin din ng heneral na may profiling na ginagawa ang mga awtoridad sa mga nagtatayo ng community pantries; isang malinaw na paglabag ito sa right to privacy ng mga indibidwal. Kaugnay nito, naglabas ng pahayag at paalala ang National Privacy Commission sa Philippine National Police na igalang ang karapatang pantao at mga batas patungkol sa pagkalap ng mga personal na impormasyon.
Nakakuha naman ng suporta si General Parlade kay Communications Undersecretary Lorraine Badoy. Hinikayat ni Usec. Badoy ang mga nagbibigay ng donasyon para sa mga community pantries na alamin kung saan napupunta ang kanilang pera. Ipinagdiinan din niyang miyembro ng komunistang grupo si Non, bagay na mariing itinanggi ng dalaga. Para kay Non, nais lamang niyang makatulong sa simpleng paraan.
Hindi ikinatuwa ng marami, kabilang ang ilang senador at kongresista, ang red-tagging na ginawa nina Gen. Parlade at Usec. Badoy. Nais ng ilang mambabatas na ilipat ang pondo ng NTF-ELCAC sa Department of Social Welfare and Development at Department of Labor and Employment. Para sa kanila, mas mapakikinabangan pa ang 19.2 bilyong pisong pondo ng NTF-ELCAC sa pagtugon sa pangangailangan ng mga tao, kabilang ang mga matiyagang pumipila sa mga community pantries. Mayroon ding nagsasabing higit na kailangang i-audit ang task force sa kung paano nito ginagamit ang pondo nito dahil abalá ito sa pagpaparatang sa mga taong nais lamang tumulong. Abangan natin sa mga susunod ng linggo at buwan kung mapananagot ng mga senador at kongresista ang NTF-ELCAC sa ginagawa nitong red-tagging.
Itinataguyod ng mga panlipunang turo ng Simbahan ang prinsipyo ng solidarity o pagkakaisa. Naniniwala tayong ang pagkakaisa ay hindi isang panandaliang pagkaramdam ng habag sa pagdurusa ng ating kapwa. Bagkus, isa itong matatag at matiyagang determinasyon upang kumilos para sa kabutihang panlahat o common good. Samakatuwid, ang pakikipagkaisa ay tungkulin ng bawat Kristiyano upang sama-samang makamit ang kaunlaran.
Kaya naman, walang lugar sa isang lipunang naniniwala sa katotohanan at katwiran ang mga walang basehang paratang laban sa mga taong kusang tumutulong at nagkakapit-bisig sa pagharap sa mga suliranin ng kanilang komunidad. Nakalulungkot na ang mga opsiyal ng pamahalaan, sa halip ay kumikilos upang mapabuti ang ating kalagayan, ang nangunguna sa pagpigil sa ating pagbabayanihan.
Mga Kapanalig, katulad ng paalala sa Galacia 3:28, “Kayong lahat ay iisa na dahil kayo’y nakay Kristo na.” Ang community pantries ay paanyaya sa ating mamuhay nang may pagkakaisa. Sa gitna ng krisis, kahirapan, at kagutuman, sino pa nga ba ang magdadamayan? Nawa’y huwag nating hayaang supilin ng mga walang batayang pagdududa ang pagkakaisa at pagdadamayan ng mga mamamayan.
