1,766 total reads
Kapanalig, buti na lamang at unti-unti ng nagbubukas ang mga tourist spots ng ating bayan ngayon. Ang industriya na ito ay isa sa mga pinadapa ng pandemya. Kamusta na ba ang sektor na ito ngayon?
Bago nagkaroon ng pandemya, kapanalig, masiglang masigla ang turismo sa bayan. Noong 2019, halos 13% ang ambag nito sa ating gross domestic product. Katumbas ito ng P2.51 trillion. Mahigit pa sa walong milyong turistang banyaga ang bumisita sa bansa, na nagdala ng $11 billion sa ating kabang bayan, habang ang lokal na turismo ay nagbigay naman ng $36.6 billion.
Kaya lamang, pagdating ng 2020, bumagsak lahat ito. Mula sa halos 13%, naging 5.4% na lamang ang ambag ng turismo sa ating GDP o P973 million. Nakakapanlumo, kapanalig. Ang pagbagsak ng turismo sa bansa noong 2020 ay dumale din ng tinatayang mga dalawang milyong trabaho sa sektor ng travel and tourism.
Kritikal ang panahong ito para sa industriya dahil ito ay panahon ng pagbawi sa lahat ng mga ninanakaw ng pandemya. Hindi man lahat ng tourist spots ay bukas, nawala man ang mga dating tindahan, restaurants, bahay-bakasyunan, at resort na dati nating kinagigiliwan, dumarami pa rin ang mga turista, lokal man o banyaga, na nagnais na maglibot na sa bansa.
Upang tuloy-tuloy na ulit ang pamamayagpag ng industrya, kailangang siguruhin ng lokal at nasyonal na gobyerno na malinaw ang kanilang mga patakaran at mga requirements para sa paglalakbay. Ngayon pa lamang ay hirap na ang iba dahil sa requirement na vaccination certificate, pero hindi naman lahat ay makakakuha nito sa VaxCertPH.
Problema din kapanalig ang paiba-ibang patakaran ng mga LGUs. Sa simpleng QR code pa lamang, hindi uniporme o parepareho ang tinatanggap. Yung iba pwede ang Staysafe App, ang iba, may kanya-kanyang app. Hirap tuloy ang mga tao kapag lalabas.
Isa pang hamon sa mga turista ay ang quarantine period na kailangan kapag pupunta sa bansa o sa anumang tourist spots. Kasama din kasi ng quarantine period na ito ang napakalaking gastos. Malaking balakid ito kapanalig dahil hindi lamang araw ng bakasyon ang binabawas dito, malaking halaga din ng budget ang kinakaltas.
Kailangang suriin maigi ng pamahalaann ang kanyang patakaran para sa new normal para sa travel and tourism industry ng bansa. Malaking pagbabago ang kailangan upang makabawi ito sa nakapanlulumong pagkalugi dahil sa pandemya. Sabi nga sa Evangelii Gaudium, ag estado ay may pundamental na bahagi para sa kasulungan o development ng lahat. Kailangan niyang tupdin ang responsibilidad na ito upang maibalik na ang dating sigla ng turismo sa bansa.
